NATOko soldatuak zuzenean ari dira Ukrainan, Pentagonoko paperen arabera

  • Masschutsttseko Aireko Guardia Nazionaleko Jack Teixeira 21 urteko gazteak argitaratu ei zituen AEBetako Pentagonoaren dozenaka agiri. Ostegunean atxilotu zuten gaztea eta halakorik nola gerta litekeen ikertzen ari dira Pentagonoan.


2023ko apirilaren 14an - 12:41
Azken eguneraketa: 2023-04-15 18:47:00

Dokumentuak AEBetako goi mailako militar eta zerbitzu sekretuetako buruentzat egindakoak ziren, eta erakusten dute agintari estatubatuarrek herrialde ugari zelatatzen dituztela, horien artean ustez etsaiak direnak, baina baita lagunak ere. Errusia eta Ukrainako gerrari buruzko datu ugari ematen dira, eta ikus daiteke Iran, Ipar Korea, Hego Korea, Israel, Erresuma Batua, Serbia, Egipto eta, besteak beste, Kanada ere zelatatu dituztela AEBek.

Errusia eta Ukrainako armadak egoera larrian daudela zehazten da, eta AEBek zalantzan jartzen dute Ukrainak izango ote duen behar besteko indar iragarri duen udaberriko erasoaldiari ekiteko, besteak beste, munizioa eta soldadu falta dituelako. Aipatzen dute, zehazki, sobietar jatorriko aire defentsarako misilak bukatzear dituztela.

Donbassen gertatzen ari dira egunotako gudu esanguratsuenetakoak, eta aipatu txostenen arabera, AEBek zalantzak dituzte Ukrainako tropek eutsi ahal izango dioten. Eskualde horretan 2023an gerra izozteko arriskua dagoela zehazten dute, eta uste dute 2023an ez dela posible izango su-etena sinatzea.

Errusiako tropen neke eta galerez ere mintzo dira paperak, eta ostiral honetan bertan The Washington Post-ek argitaratu duenez, Errusiak gerra hasieran galera oso handiak izan zituen bere spnetsnaz izeneko elite unitateetan. Pentsatu zuen haiekin azkar lortuko zuela Kiev eta beste hiri garrantzitsu batzuk hartzea, baina hasierako helburuetan huts egin zuten eta AEBetako sateliteek jaso zituzten nola erretiratzen ziren unitateok oso urrituta.

NATOko soldatuak Ukrainan

Gerraren hasieran NATOk adierazi zuen sostengua eta prestakuntza emango ziola Ukrainako armadari, baina ez zela zuzenean arituko gerran, eta bere soldaduak Polonian geldituko zirela lan hori egiteko. Filtrazio hauek erakusten dute AEBetako, Erresuma Batuko, Frantziako eta Letoniako soldaduak jadanik zuzenean ari direla Ukrainan.

Txostenen arabera, NATOko hegazkinak ere zuzenean ari dira behatzen Itsaso Beltzean gertatzen dena, eta horrek dagoeneko eragin du talkarik Errusiako aire armadarekin. Oro har, paperetan aipatzen denez, ezaguna da Ukrainako armadak duen munizio falta, eta Europar Batasuna ariko litzateke munizio hornidura egiteko bideen bila.

WikiLeaks, Snowden eta orain hau

Datu askoz gehiago ere badira aipatu txostenetan: Errusiaren aliatu historiko izan den Serbiak armak saltzen dizkiola Ukrainari, Egipto misilak ekoizten ari dela Errusiarentzat, edo AEBek Hego Koreari presioa egiten diotela armak bidali ditzan Ukrainara. Informazioa gerra arma dela argi dagoen garaian, gaitza bihurtzen da zer sinetsi eta zer ez. Edozein kasutan, aditu askoren ustez, Pentagonoko filtrazioak deitutako horiek lirateke iragan hamarkadan gertatutako WikiLeaks eta Snowderen filtrazioen ondoren izandako garrantzitsuenak.

Egia esan, gaitza dirudi sinestea armadako gazte batek egindako filtrazioa dela, adierazi denagatik bederen, enplegatu soil bat delako eta zabaldutako moduagatik. Gazteak Discord-eko lagun taldean jarri zituen lehenbizi irudiok otsailean, eta gero informazio asko Twitter eta Telegramera zabaldu dira.

Seymour Hersh: ustelkeria Ukrainan

Pentagonoko txostenen filtrazioaz gain, Seymour Hersh kazetari ezagunak asteazkenean bere blogean argitaratu zuenaren arabera, Ukraina AEBetako diru-funtsetako dirua erabiltzen arituko litzateke erregaia lortzeko. Larriena, ordea, zera litzateke, Volodomir Zelenski eta Ukrainako armadako hainbat agintari ustelkerian arituko liratekeela, dirutza horietatik zati bat eskuratuta. Areago, hainbat jeneral haserre leudeke Zelenski haiek baino gehiago ari delako patrikaratzen.

Kazetariak dioenez, William Burns CIAko buruak ustelkeria gai horiek atera zizkion Zelenskyri iragan urtarrilean Kieven egindako bilera batean, eta horretan ziharduten armadako agintarien zerrenda bat ere pasatu omen zion. Zelenskik AEBei emandako erantzuna izan omen zen nabarmenkerietan ari ziren horietako hamar kargugabetzea. Bilera horren berri zuzena duen pertsona batek emandako informazioa dela aipatzen du Hersh-ek.


Kanal honetatik interesatuko zaizu: Ukrainako gerra
Europak armak erosiko ditu, zuri pentsioa kenduta

Badator gerra handi bat. Gastu militar ziztrin horiekin ez goaz inora. Trumpek bakarrik utziko gaitu oraingoan. Herritarrek prest egon behar dute Putinen aurrean... Europar Batasuneko agintarien artean nagusitzen ari den diskurtso hori, hitz bakarrean laburbiltzen da:... [+]


Pablo Gonzalez "berehala" askatzea exijitu dute Gernikan eta nazioartean

Bi urte Polonian preso daraman kazetaria "berehala" askatzeko exijitu dute ehunka lagunek Gernikan. Madrilen, Espainiako Kongresuaren aurrean elkarretaratu dira alderdi ugaritako diputatuak; Espainiako Atzerri ministro Jose Manuel Albaresen esanetan, kazetariaren... [+]


Babes gutxi jaso du NATOko tropak Ukrainara bidaltzeko Macronen planteamenduak

Ukrainari buruzko nazioarteko bilera burutu zuten otsailaren 26an hogei bat estatuburuk eta horren berri emateko prentsaurrekoan bota du Emmanuel Macron Frantziako presidenteak NATOko tropak Ukrainara bidaltzeko planteamendua.


Zelenski: "Ukrainako 31.000 eta Errusiako 409.820 soldadu hil dira gerran”

Gerran hil diren ukraniarren inguruan Errusiak emandako datuak ezeztatu ditu Volodimir Zelenski Ukrainako presidenteak. Laguntza militarra ematen jarraitzeko eskatu die AEBei.


Eguneraketa berriak daude