Maiatzaren 18 eta 19rako greba deialdia egin dute Osakidetzan SATSE, ELA, LAB, SME, CCOO eta UGT sindikatuek. 40.000 langile inguru daude grebara deituta, eta maiatzaren 17ko 22:00ean hasi eta 19ko 22:00etan amaituko da. Sindikatuen arabera, lehen egunean "jarraipen zabala" izan du grebak, nahiz eta oraindik datu ofizialik ez duten eman. Osasun Sailaren arabera, ordea, gaueko txandan %0,10eko jarraipena izan du, eta goizekoan %9,9koa.

Sindikatuek salatu dute langileei "gehiegizko" zerbitzu minimoak ezarri dizkietela. Eider Saavedra ELAko ordezkariak EITBri adierazi dio inposatu dizkieten zerbitzu minimoen ondorioz "milaka langileri" greba eskubidea ukatu dietela. Ospitaleetan ohiko jaiegun bateko langileek egingo dute lan, Lehen Mailako Arretan, berriz, anbulatorioak larunbatetan irekitzen zituztenean lan egiten zutenek joan beharko dute. Arreta jarraituko guneetan eta larrialdi zerbitzuetan, aldiz, lanaldi arrunt bateko lanaldia izango da greba egunotan.

Saavedrak gaineratu du Osakidetzaren arazoak "egiturazkoak" dela, nahiz eta Osakidetzak pandemia erabiltzen duen gaur egungo egoera azaltzeko "aitzakia" gisa.

Martxoan eman zuten grebaren berri, eta, sindikatuek adierazi dutenez, ordutik negoziazioa blokeatuta dago. Osakidetzaren egoera "larria" dela adierazi dute, bereziki Lehen Mailako Arretan. Langileen egoera "gero eta prekarioagoa" dela salatu dute, behin-behineko kontratua duten langileen tasa handia delako eta lanaren "gainkarga sistematikoa" pairatzen dutelako langileek, besteak beste. 

Mobilizazio deialdiak

Grebako lehen egunean ospitale eta osasun zentroetan egingo dituzte mobilizazioak. Maiatzaren 19an, berriz, hiriburuetan mobilizatuko dira, Osakidetza salba dezagun lelopean. 12:00etan abiatuko dira manifestazioak: Gasteizen Buruileria plazatik, Bilbon Jesusen Bihotzatik eta Donostian Boulevardetik.

Goizean egin dituzte elkarretaratzeak Txagorritxun, Basurtun eta Donostia ospitalean. Besteak beste, Gotzone Sagardui Osasun sailburuaren dimisioa eskatu dute grebalariek. Gasteizen, Unibertsitate Ospitalea okupatu dute grebalariek, eta "Murrizketarik ez" eta "Ez dira berregituratzen ari, desmantelatzen baizik" eta "Publikoa ez da saltzen, defendatu egiten da" gisako oihuak egin dituzte.

Sagarduiren adierazpenak

Grebaren harira, Osasun sailburuak ukatu egin du Osakidetza desegiten ari denik, eta adierazi du gastuari eta inbertsioari buruzko datuek "guztiz kontrakoa" erakusten dutela. Besteak beste, baieztatu du hamaika mila lanpostu baino gehiago egonkortzeko bost lan-eskaintza publiko daudela martxan, pertsonako urteko osasun-gastua 1.800 eurotik 2.114 eurora igo dutela, eta ospitaletan zein lehen arretan inbertsioak eta proiektuak gauzatzen ari dela Osakidetza.

Sailburuak onartu du arazoa dagoela, baina arazo horren jatorria Araba, Bizkai eta Gipuzkoatik kanpo kokatu du: Espainiar estatuan eta Europan. Besteak beste, familia-mediku falta azpimarratu du. Hala, adierazi du egoera horrek luze joko duela, eta konponbideak planifikatu behar dituztela, "zentro batean ez bada, hurbilenean, arreta bermatuta egon dadin".