Roman Maiz Okelar bertsolaria otsailaren 6an hil zen, 87 urte zituela. Jon Azpillagarekin, Joxe Agirrerekin, Uztapiderekin, Imanol Lazkanorekin eta Andoni Egañarekin kantatua zen, besteak beste.
Mutrikun Santa Eskeko koplari lanetan ere urte askoan aritu zen. Duela 30 urtetik abian da bere izena daraman bertso paper sariketa.
"Txapelketetan azaldu ez den / bertsolaririk onena". Berarekin plazan jardundako Jon Azpillagak, ARGIArako jarritako bertsookin egin dio agurra zendutako bertso kideari.
Bi mila eta hamabostean
otsailak seigarrenean
Roman Okelar joan da mundutik
Santa Ageda gunean.
Herri guztia triste jarri da
egoera ilunean
merezi duen fama izango du
mundutik joan denean.
Romanek beti izan du bere
indarra eta kemena.
Nolakoa zen azaldu gabe
hiltzea izan da pena.
Lagun artean alaitasuna
ematea zuen dena
txapelketetan azaldu ez den
bertsolaririk onena.
Roman Okelar hil egin zaigu
ibili bere auzoan
bere bizia eskainia du
koplatan eta bertsoan
bere hiletan hainbeste lagun
bildu ginen errezoan
orain betiko goza dezala
zeruko paradisoan.
Gipuzkoako Bertsolari Txapelketako sailkapen fasea hastera doa: 20 saio jokatuko dira, bi itzulitara. 74 bertsolari ariko dira kantuan, eta horietatik 48 sailkatuko dira bigarren itzulirako; udazkenerako txartela, aldiz, 34 bertsolarik lortuko dute.
Gasteizko Printzipal Antzokian izanen da Arabako Bertsolari Txapelketaren finala, 17:30ean. Ez da inoren estreinako aldia izango finalean.
Ainhoa Urien, Onintza Enbeita, Sustrai Colina eta Xabi Igoa izango dira taldean, Batzar Nagusian bazkideek bozkatu eta onetsi ondoren.