Palestinaren aldeko Sumud, Gazara Bidean eta Askatasunaren Ontzidia nazioarteko ekimenen elkarlanaren ondorioa da martxa. Ekimena iragartzeko lehen komunikatuan, maiatzaren 21ekoa, horrela deskribatu dute Gazako egoera: “Gazako Zerrendaren aurkako kanpaina genozidan, Israel gosea erabiltzen ari da suntsipen masiboko gerra arma gisa. Dagoeneko 11 aste bete dira Gazako Zerrendara elikagaiak, botikak, ura eta funtsezko beste hornidura batzuk sartzeko blokeo gogor bat gertatu zenetik, eta bertan dauden nazioarteko erakunde guztiek ohartarazi dute erreserbarik gabe geratu direla. Israelgo armadak laborantza eremu eta abelburu gehienak ere suntsitu ditu, bertako ekoizpena sarraskituta. Ahulenak haurrak dira -hamarnaka hil dira gosez-, haurdun dauden emakumeak eta bularreko haurrak, eta Zerrendako palestinar guztiak gosetearen mehatxupean daude. Milioi erdi bat berehalako heriotza-arriskuan, NBEren datuen arabera”.

Martxan parte hartuko duen Palestinaren aldeko militanteetako bat da Agus Gorbea gasteiztarra, berak azaldu dizkigu ekimenaren nondik norakoak. Ekainaren 12an Egiptoko hiriburu Kairon elkartuko dira nazioarteko gainontzeko aktibistekin, 13an Al Arish hirira bidaiatuko dira, eta handik abiatuko dute martxa. “Al Arish hiritik Rafahko pasabidera 50 bat kilometro daude, Sinaiko basamortuan zehar. Errepide bakarra dago eta bertatik egingo dugu bidea, egunero 17-18 kilometro egingo ditugu. Hango kideek esan digute lehen edota azken orduan egingo dugula oinez, bestela beroa gehiegizkoa delako”. Oinezko martxa ez da izango egun horietako ekimen bakarra. “Printzipioz, egun horietan ontzi bat ere abiatuko da itsasotik”.

Mugan bi egunez egotea aurreikusi dute, bi aldarrikapen nagusi egiteko: “Genozidioa amaitzea, eta muga zabaltzea murrizketarik eta mugarik gabe”. Martxaren antolakuntzatik gogoratu dutenez, “hiru mila kamioi daude Rafahko pasabidean zain, elikagaiez, botikez eta beste funtsezko hornigaiez gainezka, eta bi milioi palestinar baino gehiago goseak hesiaren beste aldean”.

Euskal herritik dozena bat militante, momentuz

Euskal Herritik momentuz dozena bat militante antolatu dira martxara joateko, nazioartetik 2.200 inguru, 32 estatutakoak. Prestaketekin hasi direla dio Gorbeak, baina pertsona berriak batzen ari direla, eta oraindik egin ez dutenak aukera dutela egiteko, helburua Rafahn ahalik eta jende gehien biltzea baita.

Telegrameko kanal honetan (Hego Euskal Herriko herritarrentzat, Espainiako Estatuko kanala baita) eta webgune honetan dago eskuragarri ekimenaren informazio guztia, eta hortik eman dezake izena interesa duenak.

Enbaxadei interpelazioa

Parte hartuko duten herritarrek beren estatuetako enbaxadei gutuna bidali diete, ekintza iragarri eta hori burutzeko baimena lortzen lagundu dezaten. Hainbat parlamentariri eskatu diete, halaber, enbaxadekin harremanetan jarri daitezela helburu berarekin presionatzeko. Azken astean, gosete masiboaren eta erasoaldi militarraren gogortzearen aurrean, Israel baldintzarik gabe babestu duten estatuak edo Europar Batasuna sionistekin distantzia jartzen ari direla ematen du. Momentuz behintzat itxura kontuak direla uste du Gorbeak: “Netanyahu eta Trumpen artean tentsioak daudela dirudi, eta birkokatzen ari dira. Arratoiak ontzia abandonatzen ari dira, baina arratoiak izaten jarraitzen dute. Ikusiko dugu”.

Egiptok momentuz ez du posiziorik hartu martxaren aurrean, eta Gorbeak ez du konfiantza handirik agertu joka dezakeen paperaren inguruan: “Egipto diktadura militarra da, sionistekin harremanak ditu, eta Rafahko mugan Israelgo soldaduak daude”.

Arriskua, palestinarrena

Blokeoa apurtzeko Askatasunaren Ontzidiaren azken saiakera Conscience itsasontzia bondardatuta moztu zuen Israelek, Europako uretan, inpunitate osoz. Iragan ostegunean diplomazialariak tirokatu zituzten soldadu sionistek Zisjordanian. Martxako partaideei gertatu ahal zaienaz galdetuta, galdeketak, atxiloketak edo deportazioak gertatzea litekeena dela dio, “bonbardaketarik edo antzekorik ez dugu espero, baina ikusitakoak ikusita inork ezin du ezer ziurtatu”. Edonola dela, fokua beste toki batean jarri nahi izan du: , “Ez dakigu zer gertatu ahal zaigun, baina Gazako umeek pairatzen dutena baino askoz gutxiago izango da, seguru”.