Landako langileak kalera atera dira igande honetan Iruñean LAB sindikatuak eginiko mobilizazioan. Nafarroan sektore horretan diharduen langile guztientzako baldintza duinak aldarrikatu dituzte. Langile gehienak migratzaileak direla gogorarazi du sindikatuak: zaurgarritasun egoeran dagoen gero eta kolektibo handiagoa da Nafarroan, baina patronalak haien egoera ahula langileak ustiatzeko erabiltzen du maiz.

LABek langileen lan baldintza kaskarrak azpimarratu ditu: “Oso soldata txikiak dituzte, eta lan baldintza gogorrak. Askotan, legeak arautzen dituen lan-eskubiderik oinarrizkoenak errespetatzen ez dituzten lurjabeentzat lan egin behar izaten dute”.

Aldarrikapenak

Sindikatuak gogorarazi du prekarietatea eta lan-istripuak amaitzea, soldatak duintzea eta zor kolonialaren ordainketa eskatzea direla ezinbesteko baldintzak hitzarmen duin berrirako. Beste hainbaten artean, hauek izango dira aldarrikapen nagusiak: KPIa bermatzea; lanaldi jarraia eta bi atseden egun izatea; lantokira joateko garraioa ordaintzea, istripu hilgarririk gerta ez dadin; senitartekoen distantzia kontuan hartzen dituzten baimenak izatea eta haiek zaintzeko aukera ematea; lan egiten ez dutenen langabezia kobratu ahal izatea; peoi biltzailearen kategoria bidegabea eta esklabista kentzea; eta lanaldien benetako kontrola izatea, benetan lan egiten diren orduen iruzurra saihesteko.