ELA sindikatuak egin du salaketa. Jakitera eman duenez, Nekane Murga Eusko Jaurlaritzako Osasun Sailburuak “modu irregularrean” parte hartu zuen bi lanpostutarako hautaketa prozesuetan.

Esther Saavedra ELAko arduradunak azaldutakoaren arabera, bi prozesu horiek Murga Osasun Sailburu izendatu aurretik egin ziren; 2017ko martxoan bata, eta urte bereko abuztuan bigarrena. Zerbitzu eginkizunetako postu bana betetzeko jarri zen martxan prozesu bakoitza. Lanpostu horretarako hautagai bakoitzak proiektu bat aurkeztu behar zuen, ebaluazio batzorde batek kalifikatuko zituenak. Ebaluazio batzorde bakoitza hiru pertsonaz osatua zegoen, eta bateko zein besteko partaide izan zen Murga.

Saavedrak azpimarratu du legeak eragotzi egiten ziola Murgari batzordeotan parte hartzea. Izan ere, konfiantzazko kargudunek ezin dute halako batzorde batean egon, eta orduko hartan Murga konfiantzazko karguduna zen, Osasun Saileko Plangintza, Antolamendu eta Osasun Ebaluazioetako zuzendaria izanik.

Sindikatua bi prozesuen emaitzez mintzatu da: karrerako funtzionario bakar batek ere ez zuen lortu lanposturik. Lehenengo deialdia hutsik geratu zen, eta kontratazio poltsara jo zuten; bigarren deialdian, aldiz, lanpostua beste departamentu bateko behin-behineko funtzionario bati esleitu zioten.

“Langileak hautatzeko sistema ustel bat dago indarrean, eta sistema horretan Osakidetzako eta Osasun Saileko zuzendaritza beste eragile bat da”, adierazi du Igor Eizagirrek, ELAko Gizalan federazioko idazkari nagusiak.