Akordioa itxita dago, “ofizial egitea besterik ez da falta, hitzarmena sinatuz”, adierazi du Alfredo Retortillo sailburuak, Noticias de Gipuzkoa egunkariak jaso duenez. Hortaz, 2018ko maiatzean Turismoaren Mundu Erakundea Donostian lehorreratuko da hiru eguneko jardunaldiak egiteko.

Fitur turismo azoka abian jarri baino egun bat lehenago iragarri du Jaurlaritzak akordioa eta Retortillok berak aitortu duenez, euren asmoa zen feria horretan bertan sinatzea goi-bilera Donostiara ekartzeko akordioa –azkenik agenda-arazoengatik ez da hala izango–.

Turismoaren Mundu Erakundea 1975ean sortutako instituzioa da, formalki Nazio Batuen Erakundeari (NBE) lotua. Madrilen du egoitza nagusia eta 156 estatu kide ditu.

Zurab Pololikashvili da erakundeko idazkari nagusia, lehenago Georgiako Garapen Ekonomikoko ministro izandakoa besteak beste. Politikan jardun aurretik, bankari gisa egin zuen lan Georgiako TBC Banken; gainera, Dinamo Tblisi futbol taldeko zuzendari nagusia izan zen.

Erakundearen helburu nagusia turismoa agenda globalean “sistematikoki” integratzea da. Elkartearen webguneak azaltzen duenez, “gaur egun turismoaren negozio-bolumenak petrolio-esportazioak, elikagaiak edo automobilak berdintzen edo gainditzen ditu” eta haren hazkundea sustatzeko turismo-lekuen “dibertsifikazioa eta konpetentzia” handitzea beharrezkotzat jotzen du.