Motxiladun umeek urte erdi daramate gurasoak ikusi gabe
Euskal presoen seme-alabek urte erdia aita, ama edo biak ikusi gabe daramatela salatu du Sarek. Ia 100 motxiladun haur eta nerabe daude Euskal Herrian: “Zein agintari, politikari, epaile edo herritarrek onartuko luke seme-alabak ikusi eta besarkatu gabe hainbeste hilabete egotea?”.
Sare Herritarrak gogoratu du motxiladun haurrek zigor hirukoitza bizi dutela: egunerokoan guraso presoarekin ezin egotea, gurasoei aplikatzen zaien salbuespen legedia, eta urruntze politikagatik gurasoak ikusteko egin beharreko milaka kilometroak. Pandemiaren testuinguruan, gainera, zigor bat gehitu zaio: hilabete luzez aita edota amarekin ezin elkartzea. Haur gehienek otsailetik daramate preso dauden gurasoak ikusi gabe.
Sarek azaldu duenez, kartzela batzuetan esan diete abuztuan ere ez dutela familiarteko aurrez aurrekorik izango. Horrez gain, “konfinamendu, isolamendu eta neurri berrien mamua gero eta handiagoa den honetan, nork ziurta diezaieke haurrei ama ikustera Galiziara edo aitarekin jolastera Cordobara joan ahal izango dutenik?”.
Izadi, Irati eta Ilargi
Espetxean bizi diren motxiladun umeen egoera bereziki larria dela nabarmendu dute: “Aranjuez eta Picassenteko espetxeetan daude Izadi, Irati eta Ilargi. Oraindik ez dizkiete aurrez aurreko familiarrak eta konbibentzikoak onartu, eta ez dakite abuztuan izango dituzten”. Pandemiaren aurretik, ume horiek asteburuak senideekin kanpoan pasatzen zituzten, “kalearekin lotura sendotzeko ezinbesteko prozesu progresiboa baita”. Orain, irteera horiek etenda daude.
Euskal presoek aspaldi Euskal Herrian egon beharko luketela eta konponbidearen aldeko urratsak eman behar direla aldarrikatu dute. “Nola aurreratu daiteke bakean edo elkarbizitzan gaur azaleratutako egoera hauek mantenduz? Ezinbestekoa eta urgentea da preso eta iheslarien auzian ere benetako urratsak ematea”.
Motxiladun haurra izango da Izadi, Maria Lizarraga eta Iñigo Gutierrez euskal presoen alaba. Igandean bete ditu hiru urte, eta legeak hala dioenez, Aranjuezeko espetxetik atera dute urtemuga egunean, amagandik banatuta. Aitarekin elkartu da, Gutierrez ostiralean aske utzi... [+]
Domekan, hilaren 23an, Iñigo Gutierrez (Algorta) eta Maria Lizarraga (Burlata) presoen alaba den Izadik hiru urte beteko ditu eta, ondorioz, gurasoengandik banatzera behartuko dute. Hori salatzeko, Izadi Gurasoekin Etxera ekimenak manifestazioa egingo du Algortan, Txiki... [+]
Martxoaren 20an ekitaldi bateratua antolatu zuten Bilbon Irati Gurasoekin Euskal Herrira ekimenak eta Sarek. Umeek haien guraso presoekin Euskal Herrian egoteko aukera izan dezaten aldarrikatu dute.
Madrilen preso dauden Bea Etxebarria eta Iñigo Zapirain euskal preso politikoen alaba da Irati. Iratiren gurasoak Euskal Herriko espetxeetara ekartzea eskatu du Sarek.
Jira eta Bira Irati gurasoekin Euskal Herrira kalejira burutu da larunbat honetan Bilbon, Arriaga Plazatik Areatzara. Zaballako espetxean familientzako modulu misto bat edo zaintzapeko pisu bat prestatzea eskatu da, Irati haurrak bere gurasoekin bizitzeko aukera izan dezan.