Mediku egoiliarrek txosten klinikoak euskaraz idatziko dituzte Gasteizko ospitaletan, Euskaraldiaren uholdea probestuta
Gasteizen lan egiten duten mediku egoiliar ugarik urrats txiki baina esanguratsua egingo du datozen egunetan: gaixoei bideratutako txosten klinikoak euskaraz idazten hasiko dira. Osakidetzak baimena eman die hainbat zentrotan, baina trabak ere jaso dituzte. “Langileok gure aletxoa jartzen hasiak gara, bada garaia euskaldunok gure osasunaren jabe bihurtzeko”.
Gasteizen kokatuta dauden Osakidetzako zentroetan lan egiten duten mediku egoiliar ugarik, euskaraz bizitzeko aukera egikaritzeko bidean aurrerapausoa emateko hautua egin du. Orokorrean, Osakidetzak gaztelania hutsean funtzionatu eta euskara txoko txiki batzuetara mugatua dagoela ikusten dute bai paziente, bai ikasle eta baita langileek ere. Hala eman diote jakitera Hala Bediri Gasteizko eta beste zenbait ospitaletako hainbat egoiliar euskaldunek helarazitako oharrean.
“Hizkuntzaren muga hau, gainera, ahozkotasunera mugatzen da, praktikara eta erregistroetara iristen ez den espazioetara, salbuespenak salbuespen”, salatu dute. Euskarak Osakidetzaren erdigune izan behar lukeela uste dute, bai egiten dituzten txosten eta idazkietan, baita kontratazio irizpide, formakuntza eta abarretan ere. “Euskara ezin da ekimen folkloriko hutsetara mugatu”.
Euskaraldiak dakarren uholdea probestuta, urrats txiki baina esanguratsua egingo dute datozen egunetan: gaixoei bideratutako txosten klinikoak euskaraz idazten hasiko dira zenbait ospitaletan. Jakinarazi dutenez, Osakidetzak horretarako baimena eman die zenbait zentrotan, baina baldintza konkretu batzuekin. “Langileok aurrera gindoazela ikusita, eta benetan euskal gizartearen beharrak interpretatuta, baimena eman digute prioritate edo larritasun maila baxuko kasuetan euskaraz idaztera”.
Zentzu honetan, esker onez hartu dute txostenak egiteko baimena eman izana. Hala ere, txosten horiek euskaraz idatzi ahal izateko ez dietela baliabiderik eskaini azpimarrratu dute: “Espainolez ditugun aurreidatziak euskaratzeko lana gure gain hartu behar dugu, baita zentro ezberdinetako lankideekin elkarlanean ekimena zabaltzeko ardura ere”.
Oztopoak oztopo, aurrera doa ekimena, eta haien baimenarekin “baina laguntza gutxirekin”, langileek hartua dute pazienteek behar duten “kalitatezko arreta” emateko pausoa: “Langileok gure aletxoa jartzen hasiak gara, bada garaia euskaldunok gure osasunaren jabe bihurtzeko”.
Hortaz, pazientegai, langile, eta euskal herritar orori gonbita luzatu diote osasun administrazioei arreta euskaraz eskaini eta komunikazio kliniko idatzia ere euskaraz emateko, Elebideri eta norbere osasungintzako arduradunari (Osakidetza zein Osasunbideari) iradokizun, eskaera, edo kexa bideratuz. Aldi berean, euskaldun orori eskaera egikaritzeko aurrerapausoak emateko erronka luzatu dute, “ahozko ohiturez gain espazio ofizialak ere gureganatzeko”.
“Euskaldunok ez gara bizitzeko baimena eskatzera etorri, eta euskaldunon herria eraikitzeko asmoarekin gaudela ikustekotan gaude”.
Albiste hau Hala Bedik argitaratu du eta CC-by-sa lizentziari esker ekarri dugu ARGIAra.
Aurtengo ikasturtean A2 mailara arteko ikastaroetako dirua itzuliko dute EAEn, baita C1ekoak 16-18 urteko ikasleei ere. Nafarroan A1 mailan matrikularen prezioa itzuliko diete.
Ez diote ezeri muzin egin nahi opor giroan: natura, aisialdia eta gogoeta izango dira ardatz Euskaltzale Independentisten Akanpadan, abuztuaren 25etik 31ra.
Hankak lurrean dituzte gure solaskideek. Euskalgintzaren eta herri mugimenduen joko-zelaian dabiltza etengabe eta eskarmentu horretatik hitz egiten dute euskarari eusteaz, hizkuntza zapalkuntza ez normalizatzeaz eta erdaldunengandik espero beharko genukeenaz. Gorka Torrek ez du... [+]
Euskarazko B2 maila dutela ez ziurtatzeagatik Eibarko Egogain zaharren egoitzako lan eskaintza publikotik kanpo utzi zituzten bi langileen alde ebatzi du Donostiako Lehen Auzialdiko 3. Epaitegiak, CCOOk jakinarazi duenez. 2024ko urrian, Gonzalo Pérez Sanz epaileak... [+]
Igande goizean elkarretaratzeak egin dituzte Euskal Herrian Euskarazek deituta, Geldi euskara zapaltzea! lelopean.
Administrazioa euskalduntzeko legeria aldatu beharra dagoela azpirramatzen du LAB sindikatuak eta hori lortzeko "herritarren aktibazioa" ezinbestekotzat hartu du. Hainbat ekimen eta mobilizazio egingo dituzte udazkenean.
Lapurdiko eskola batetik saiatu dira datorren ikasturterako Ganbara Hostel Bilbaon aterpea lotzen, baina Behatokian salatu dutenez, idatzizko komunikazioan euskaraz aritzeagatik zera esan diete azkenean: “Espainolez mintzatzen ez ginenez, ez gintuztela beren hotelean... [+]
Oraingoz hamabi gazte-taldek eman dute izena. Taldeen arteko bikoteak osatuko dituzte, eta haien arteko harreman informalak euskaratik eta euskaraz garatuko dituzte. Helburua da kontzientzia linguistikoa berpiztea. Euskal Herrian Euskarazek eta Gazte Euskaltzaleon Sareak abian... [+]
Hizkuntz Eskubideen Behatokiak argudiatu du kontraesanean daudela jardunaldien helburua, hau da, gaztelania bultzatzea, eta euskararen normalizazioa eta biziberritzea. Observatorio Global del Español erakunde antolatzaileari gutunez eman dio erabakiaren berri, eta 2024an... [+]
Donostiako Udaleko langileen batzordea osatzen duten bost sindikatuek (ELA, LAB, CCOO, Erne eta ESAN), akordioa egin dute, Euskaraldia dela-eta langileen parte hartze aktiboa sustatzeko eta euskaraz bizi eta lan egiteko aukerak bermatzeko. LABeko ordezkari Joseba Alvarezek... [+]
Nafarroako Unibertsitate Publikoko Euskara Taldeak inkesta bat egin du ikasleen artean. Halaber, euskara plana ikasturte honetan amaitzen dela ikusirik proposamen berriak egin dizkiote unibertsitateko zuzendaritzari. NUPen euskaraz ikastea "ezinezkoa" dela ere salatu... [+]
Ospitalizatuta dauden pazienteek eskumuturrekoan eramango dute “e” ikurra. Hala, osasun langileek badakite herritar horiek eskatu dutela euskaraz artatua izatea. Osakidetzak dio euskarazko komunikazioa errazteko beste tresna bat gehiago dela. Proiektu zabalago bateko... [+]
EHEk deituta, Baionan manifestazioa egin dute apirilaren 6an. Euskararentzat eta euskaldunentzat justizia eskatu dute, eta Euskararen Errepublika aldarrikatu. Hilaren 11n EHEko bi kide epaituko dituzte Baionako auzitegian desobedientzia ekintza bat egin izanagatik.
Behatokiak Hizkuntza Eskubideen Egoera 2024 txostena aurkeztu du. Herritarrek helarazitako gertakarien bilduma aztertuta, ondorioztatu dute 2024an egoerak ez duela hobera egin, eta gainera, kexak jaso dituzten hainbat entitateren eskutik urraketak iraunarazteko jarrera sumatu... [+]