Danimarkako lehen ministroa “ile-hori guapa hori" denean

Nelson Mandela hil ostean, mundu osoko agintariak bildu ziren haren hiletan. Barack Obama AEBetako presidenteak erretratua egin zuen Danimarkako lehen ministro Helle Thorningekin. Agence France Press (AFP) argazkilaritza agentziak “identifikatu gabeko funtzionario” bezala izendatu zuen Thorning, irudia hartu eta gero.

Gainontzeko hedabideek ere ez zuten akatsa zuzendu. Tartean, El Mundok “Obama bikotearen artean arazoa sortu duen ile-horia” artikulua kaleratu zuen.

Nola akabatu eta zatikatu emakume baten gorpua?

Hori da Televisión Castilla la Manchak azaroaren 11ko arratsaldeko albistegian azaldu zuena. Ofizioz harakina zen gizon batek emakume bat erail zuen, eta ondoren harategian bertan txikitu zuen gorpua. Telebista kateak harakin batengana jo zuen berria dokumentatzeko, haragia pusketatan egiteko makina nola erabiltzen den jakiteko.

Reguerok hedabidearen jarrera kritikatu eta berriaren trataera zehatz mehatz azaldu du haren blogean.

Shaolin “maisua”

Juan Carlos Aguilarrek bi emakume erail zituen, Bilbon. Borroka arteetan aditua omen zen eta hori jarri zuten medio askok erdigunean. “Shaolin maisua” bataiatu, eta haren “mistizismoaren” inguruko erreportajeak plazaratuz.

Kasu horretan, “bigarren mailako herritar gisa” tratatu zituzten eraildakoak, Regueroren iritziz. Gertakariaren harira, June Fernandez kazetariak emakumeak prostitutak eta afrikarrak zirela esatearen garrantzia azpimarratu du artikulu honetan.

Abortua, emakumeen erabakitzeko eskubidea jo puntuan

“Erailtzea delitu izango da berriro ere Espainian”. Titular hori aukeratu zuen La Gaceta egunkariak abortuaren legearen Erreformaren gaiari eusteko. Ez ziren gutxiagorako izan La Razon eta ABCen azalak.

Lehenengoak, Down sindromedun haurra eduki  zuen familia eraman zuen azalera , “Bizitzaren garaipena” esaldipean. Bigarrenak, azken fasean zegoen emakume haurdun baten irudia hartu zuen.

Bikotekidea hil zuen kirolaria

Oscar Pistorius korrikalari paraolimpiar afrikarrak bikotekidea hil zuen iazko martxoan. Mass mediek ez zuten indarkeria matxistan arreta jarri. Marta Medianok Pikara Magazinen aztertu bezala, arazoa beste bat izan zen hedabideen aburuz.

“Haientzat drama da Pistoriusek liderrik gabe uztea hegoafrikarrak, atletismoaren zaleak eta Mendabaldeko gizonek orokorrean, baita Joko Olinpiarretan parte ez hartzea ere”. Emakume bat hil izanari arreta gutxi bideratzea salatzen du Medianok, eta egiturazko indarkeriaren aipamenik ez egitea. Medioek "kirolari" figura indartu izana kritikatu du.