Marieneko lurren aldeko hiru atxilotuak aske utzi dituzte, baina otsailean epaituko dituzte
Apirilean Kanboko Herriko Etxean sartu eta han egindako protestekin lotuta hiru lapurtar atxilotu ditu asteazkenean Frantziako Poliziak. Aske geratu badira ere, otsailean epaituko dituzte. Herriko Etxearen babesarekin, Bouygues enpresak duen etxebizitza eraikuntza egitasmoaren kontra dabiltza mobilizaturik.
aurre egingo dieten hedabide independenteak
Marieneako lurren aldeko borrokaren harira asteazkenean atxiloturiko hiru lapurtarrak aske utzi dituzte egun bukaeran. Aske izanik ere, epaiketa ukanen dute otsailean. Apirilean Kanboko Herriko Kontseiluaren bileran egindako protestari lotuak dira atxiloketak. Lur horiek etxebizitzen eraikuntzara bideratu beharrean, laborantzarentzat atxikitzearen alde mobilizatu ziren egun horretan dozenaka herritar. Jendarme, manifestari eta hautetsien arteko bultzaden artean Christian Deveze auzapeza erori zen, eta hitz gogorrak ukan zituen manifestarien kontra.
Bouygues enpresak etxebizitzak eraiki nahi ditu Kanboko Marienia etxaldeko laborantza lurretan, eta herritarrek kontrako mugimendu zabala antolatzea eragin du horrek. Manifestazioak, okupazioak, ekintza sinbolikoak, auzi bideak zein petizioak, hainbat ekintza bideratzen dabiltza egitasmoa geldiarazteko xedez, baina oraingoz ez du atzera egiteko asmorik auzapezak.
