Eguzkik hiru zabortegi ilegal salatu ditu Azkoitian, Urola ibaiko bazterrean. Hondakin gehienak Azkoitia eta Azpeitia lotzen dituen GI-2634 errepidearen zubipean edo ibaira daramaten maldetan pilatzen ziren, baina baita hirigunean bertan ere, Ugarte kalean zehazki, zaborrontzietatik oso gertu.

Talde ekologistak, barreiaturik zeuden hondakinok bildu ditu, ageriago gera dadin zabor-pilaketa norainokoa den. Uda hasieran egin zuen lehen bilketa lana Juan Txiki poligonoan Urolara daraman malda batean, eta hango hondakinak eliza atarian izan zituen ikusgai.

Salatu duenez, hiru hilabete geroago "malda hori berriz ere hondakinez beteta dago. Hondakin gehienak plastikoak dira, baina denetatik dago, baita garbigailu bat ere".

Eguzkik nabarmendu du hondakinak bazterretan botatzeak kalte egiten badu, are okerragoa dela erreka bazterretan isurtzea "urak errazago kutsatuko direlako eta, gainera, berandu baino lehen itsasora iritsiko direlako".

Gogorarazi du herritarrak "espantuka" aritzen direla ozeanoan "kontientente baten adina azalera duen plastiko multzoa" dagoelako, baina aitzitik, irudi horren eta "eguneroko praktiken" arteko loturarik ez dela egiten.