Astelehenetik ostegunera, goiz osoko saioak eginen dituzte martxoaren 18ra arte. “Langabezian dagoen edonork agroekologiaren bueltan zerbait egiteko ideia bat badu, tresna gehiago eskuratzeko aukera izanen du ikastaroan”, azaldu du Ione Andia Celaya Economias Bioregionales elkarteko kideak. Zerbait martxan jartzeko zalantzetan dabiltzan pertsonei behar duten bultzada ematea da asmoa, baina Andiak azpimarratzen duenez, gai horren bueltan ideia konkreturik ez duenak ere badu bere tokia ikastaroan. “Hasiberriak eta agroekologiarekin loturarik ez dutenak ere etor daitezke, noski”. Emakumeek lehentasuna dute.

Hiru ataletan banatuko da elikagaien eraldaketaren inguruko ikastaroa. Batetik, ikaskuntza komunitateen bidez hausnarketa eta jakintzen partekatzea eginen dute lau orduko hiru saiotan. “Sareak sortzeko, talde ikerketak egiteko eta sektoreko esperientziak partekatzeko helburua dute saiook”. Sektoreko hainbat ekintzaileren bisita ere izanen dute, haien esperientziatik ikasteko. Bigarren atala formazioarena da: eraldaketa prozesuei, tresneriari, ekintzailetzari eta bestelakoei lotutako kontuak landuko dituzte. Azkenik, behin ikastaroa amaitutakoan, partaide bakoitzak banakako aholkularitza eta jarraipena izanen du bere proiektua garatu ahal izateko.

Ekoizpen agroekologikoa lantzen

Irizpide agroekologikoetan oinarrituta, eraldaketari lotuta antolatu duten ikastaro honen aurretik, ekoizpenaren alorrekoa abiatu zuten duela gutxi Azkoienen. “Ikastaro hartan sumatu genuen bazegoela edozertan lan egiteko beharra zuelako hurbildu zen jendea, baina horiek bazutela gogoa ere. Bestetik, badaude gutxi batzuk lehenagotik baratzea lantzen ari zirenak eta gaiarekin oso motibatuak daudenak”. Pozik daude izandako erantzunarekin, batez ere, ikusita Azkoienen erabilpenik gabe zeuden udalaren baratze sozial batzuk orain lantzen ari direla.

Lehen bi ikastaro hauen ondotik, formazio gehiago antolatzen jarraitzeko asmoa dutela azaldu du Andiak, nahiz eta oraindik zehaztu gabe egon zertaz eta non izanen diren: “Pena da, oraindik gaiaren inguruan interes falta ere sumatzen delako. Askotan eskatzen ditugu horrelako gauzak martxan jartzea, baina gero, pena da izen ematean leku guztiak ez betetzea”. Interesa dutenek, informazio gehiago dute vivesemprende.org webgunean.