La Directa hedabideak salatu du mehatxu faxistak jaso dituztela kazetariek
Hedabide katalaneko langileek jakinarazi dute urrian mezu faxistez betetako eskutitz bat jaso zutela erredakzioan, eta maiz iraintzen dituztela kazetariak. Halere, salaketarik ez jartzea erabaki dute, "polizien eta eskuin muturreko kideen arteko lotura egiaztatu ostean".
La Directa Kataluniako hedabide independenteak mehatxu faxistak salatu ditu. Besteren artean, urriaren 18an erredakziora mehatxuz jositako gutun bat iritsi zen, zera zioena katalanez, eskuz idatzitako orrian: “Txibato putasemeak, ens caguem en els vostres morts. Ez zarete horrela geratuko. Putasemeak!!!”.
Zenbait eskuorri ere zituen gutunak, Oriol Junqueras, Ada Colau eta Carles Puigdemonten irudiekin batera gaztelerazko mezu faxistak zituena: “Moro zikinak!!! Espainiatik kanpora!!!”, “Stop sepa-ratas”, “Antifaxista, me cago en tu puta madre”, “Berreskura ditzagun geure auzoak, Menak kanpora!”. Directako kazetariek ohartarazi dute ez dela eskuin muturraren aldetik horrelako mehatxuak jasotzen dituzten lehen aldia. "Gutun anonimoak, bide publikoetan botatako oihuak manifestazioetan, sare sozialetan mezuak...", zehaztu dute.
Salaketarik ez
Halere, hedabideak jakinarazi du ez dutela inoiz salaketa formalik jarri, argi dutelako poliziak eta eskuin muturra lotuta daudela: “Polizia-agenteen eta ultraeskuineko kideen arteko konplizitateak eta sinergiak egiaztatu ondoren –kirol-ospakizunen testuinguruan, baina baita etxegabetzeen esparruan ere–, ondorioztatu dugu Mossos d 'Esquadra eta Fiskaltza buru dituen edozein ikerketa artxibatu egingo luketela. Gainera, edozein kazetarirentzat benetako arriskua da datu pertsonalak sartzea, hala nola telefonoa edo helbidea, ultren aurkako zigor-auzi batean”.
Gogor kritikatu dute justizia sistema: “Disidentzia antikapitalistaren aurkako borrokan baliabide izugarriak bideratzen dituen lege-sistema baten atzaparretan gaude, baina, aldi berean, eskuin muturretik datorren eraso oro, bereziki espainolista, berme-arreta handiz tratatzen du”. Justiziak joera jakina duela salatu dute, eta “inork bozkatu ez dituen toga batzuk politika egiten” jarduten dutela gaitzetsi dute.
Defentsarik onena erasoa, kazetaritza bidezkoa, dela berretsi dute. "Ikertzen jarraitzea, informatzen jarraitzea, antifaxismoa egituratzen jarraitzea, ahotsa emanez gorroto-mezuak, kanpaina arrazistak eta beldurraren inposaketak geldiarazten dituzten herrialde osoko ekimen guztiei".
ARGIArekin azken kolaborazioa egin nuenetik lau hilabete igaro direnean, testu honen bidez nire iritzi-artikuluei berriro heldu diet, baina azalduko dizuet zergatik alde egin dudan denboraldi honetan aldizkari maitagarri honen orrialdeetatik.
Otsailaren 20an La xarxa ultra... [+]
Memoria historikoaren aldeko hemeretzi eragilek bat egin dute, Askatasunaren Plazako eraikina eraisteko eskatzeko. “Ezinezkoa da frankismoaren monumentu honi nortasun berri bat ematea”, azaldu dute.
Iazko uztailean eraso zion faxista talde batek, labanaz. Orain, erasotua izan zen pertsona horri jarri diote 600 euroko isuna, faxistetako bati aurre egitea leporatuta.
Ehunka lagun elkartu ziren ostiralean Aitor Zabaletaren omenez Bultzadak eta bestelako talde antifaxistek antolatu zuten manifestazioan. 25 urte bete berri dira ultraeskuindar batek Aitor Zabaleta realzalea hil zuenetik, eta hura gogoan, 19:00etan Bulebarretik abiatu zen... [+]