Bizilagunak ekimenak bosgarren edizioa du aurten. Bazkariak antolatuko dituzte Euskal Herriko hainbat herri eta hiritan. Bertan, bi familia elkartuko dira bazkaltzeko, bata euskalduna eta bestea atzerritarra. Euren arteko ezagutza sustatzea eta bizikidetza baldintzatu dezaketen aurreiritziak gainditzea da helburua.

Gizarte eraldaketarako tresna izan nahi du Bizilagunak egitasmoak. Ezagutza eta harreman berriak errazten dituela azaldu dute antolatzaileek, baita aniztasunaren aldeko jarrera duen gizartea bizkortzen ere.

SOS Arrazakeriak sustatutako ekimena da, eta Euskal Herriko hainbat herri eta hirietako elkarteek egin dute bat. Azaroaren 13an bazkariak antolatuko dituzte Barakaldon, Bidasoaldean Debagoienan Donostian, Eibarren, Ermuan, Gasteizen, Getxon, Hernanin, Oarsoaldean, Ordizian, Pasaian, Tolosaldean, Usurbilen, Zarautzen eta Zumaian.

Horrez gain, Gipuzkoa Solidarioa egitasmoa ere antolatu du erakundeak urtero legez Donostiako Victoria Eugenia Antzokian. Azaroaren 26an izango da, 17:00etan. Bizilagunak ekimenean parte hartuko duten pertsona guztien bilgunea izango da, eta umore eta antzerkiarekin batera, kirola izango du aurtengo edizioak ardatz. Izan ere, “kirol munduak integraziorako ahalmen handia” duela azaldu dute antolatzaileek.