Iragan asteko bileran bezala, Pedro Sánchez Espainiako Gobernuko presidenteak argi utzi du konfinamendua aritzeko erritmoa eta modua Espainiako Gobernuak erabakiko duela. Eldiario.es-ek jakinarazi duenez, hainbat presidentek erkidegoen parte hartze handiagoa eskatu dute neurri horien zehaztapenean edo kudeaketan. Generalitateko presidente Quim Torrak eredu zentralizatuaren eragingarritasun eza azpimarratu eta alarma egoera moldatzea eskatu dio Sánchezi, erabakiak autonomien esku gera daitezen. Ondoren Iñigo Urkullu EAEko lehendakariak “kogobernantza” eta “autogobernua errespetatzea” eskatu du, Alemania jarriz eredu bezala. “Irizpide gehiago eta agindu gutxiago”, adierazi du Urkulluk. Biei oso antzeko hitzekin erantzun die Sánchezek: "Integrazio prozesu bat egiten ari gara, eta uste dut deserosoa izan daitekeela, baina deseskalada koordinatzeko ardura dugu eta ez dugu erantzukizun hori saihestuko”.

Chivite, ardura eta lidergo “partekatuen” alde

Nafarroako lehendakari María Chivitek zein Urkulluk prentsaurrekoak eman dituzte bileraren ostean. Chivite ados azaldu da Espainiako Gobernuak azaldutako arintze planarekin zein hori kudeatzeko moduarekin: “[Espainiako Osasun] Ministerioak ezarriko du marko orokorra, eta Nafarroak kudeatuko du fase asimetriko hori, gure osasun errealitatea eta soziala kontuan hartuta. Ardura partekatuak eta lidergo partekatuak bateragarriak dira».

Eman beharreko pausuak landuko dituen “trantsiziorako batzordea” osatuko duela iragarri du Chivitek. Hiru eskaera nagusi zuzendu dizkio Sánchez presidenteari. Nekazaritza lanei begira, langileek Nafarroa Garaia osoan mugitzeko eskubidea izatea defendatu du (gaur egun bizilekuko edo ondoko udalerrian soilik egin daiteke lan). Ikastetxeei dagokienez, ikasturtea amaitu orduko klase presentzialak berreskuratzea gaurdanik ez baztertzea eskatu du. Politika ekonomikoaren eremuan gastu araua malgutzea proposatu du, diru gehiago erabiltzeko aukera izan dezaten erkidegoek.

Urkullu, merkataritzara eta udara begira

Eusko Jaurlaritzaren “normaltasun berrirako trantsizio plana” aldarrikatu du Urkulluk bileran. Aurrera begira bi gai nabarmendu ditu. Batetik, komertzioak oro har pixkana irekitzen hasteko proposamena, elikagaietakoei ezartzen zaizkien neurri berdinekin. Bestetik, udari begira hainbat esparrutan “irizpideak partekatzeko” beharra, hala nola kultur edo kirol arloko jarduerak, ekitaldi herritarrak, hondartza eta igerilekuen kudeaketa edo jarduera fisikoa.