Apirilaren 28an hasi zen Hego Amerikako herrialdea astindu duen matxinada herrikoia 800 udalerri baino gehiagotan, Bogota eta Cali gisako hirietan ere. Protesta sozialari Iván Duqueren gobernuak eman dion erantzun militarizatuaren aurka martxa baketsu erraldoiak, manifestazio artistiko eta kulturalak egin ostean, Comité Nacional del Parok ezin izan du lortu gobernuak sinatzea protestarako eskubidea errespetatuko duela. Hori dute finkatua matxinada sozial honi amaiera jartzeko negoziazioak abiatzeko baldintza gisa.

Ekainean sartu berritan, irakinaldiak hilabete bete duenean, Comité Nacional del Parok berriro mobilizatzera deitu ditu kolonbiarrak, Telesur hedabidean irakur daitekeenez. Ekainaren 2an eta 9an protesta egitera deitu dituzte.

Zer gertatzen ari da baina Kolonbian, hain mobilizazio luzean horrenbeste jendek parte hartzeko? Kataluniako La Directa hedabidean Susan Solano elkarrizketatu dute, protestetan parte hartzen ari den enpresaritza ikasle kolonbiarra. Miseria, desoreka sozialak, guda eta gosea, ahanzturan erorita dauden herrialdeko hainbat eskualdetan guztiz normalizatuak, jada ez dira onargarriak pairatzen dituzten kolonbiar askorentzat. "Badirudi dozenaka mila pertsonak, beren izenean edo eragile sozialetan antolatuta, izan indigenak, nekazariak, jatorri afro-a dutenak, ikasleak, sindikatuak... argi dutela herrialdea blokeatzen jarraituko dutela mobilizazioen bidez, inposatu nahi dizkiguten erreforma guztiekin amaitu arte", dio.

Lehergailuaren metxa erreforma fiskalak piztu zuen (atzera bota zuten protesten ondorioz) eta Poliziak hainbat protesta baketsutako parte hartzaileak tiroz edo granadekin hil izanak egoera leherrarazi zuen. Ondoren, osasun sistema pribatizatzeko asmoak ere aurretik eraman dituzte, Ogasun ministro Alberto Carrasquillak eta Atzerri ministro Claudia Blumek dimititu behar izan dute, eta unibertsitateak doan izatea lortu dute langile eta ertain klaseentzat.

Poliziaren bortizkeria izugarria

Protesta hauek guztiak, ordea, garesti ordaintzen ari dira kolonbiarrak. Sare sozialetan zabaltzen diren bideoetan ikus daiteke nola darabilten modu desproportzionatuan poliziek eta agente parapolizialek bortxakeria. New York Times gisako hedabideak iritsi dira horri sinesgarritasun guztia ematera.

Jarraian ikusgai den bideoan ageri dira adibide batzuk.

Bortizkeriaren irudi lazgarrienetako batzuk Cali hiriko aldirietan ikusi ahal izan dira. Ia etengabe blokeatuta daukaten hiriaren kanpoaldean poliziak atxilotutako herritarren gorpu zaurituak aurkitu dituzte, eta ez dira gutxi izan ibaiak agerrarazi dituen manifestarien gorpuak.