Izuaz eta babesaz

  • Askotarikoak izan dira azken asteotan Euskal Herriko zein Espainiako estatuko prentsan ikusi ditugun titularrak (susmagarriki, hauteskunde kanpainaren bezperetan): “Durangoko emakumeak askeago egingo dituen botoia”, “nola saihestu eraso matxistak klik batekin”, “mehatxatuak sentitzen diren emakumeentzako botoia”... Bai, Durangoko udalaren azken iragarpenaz ari gara: Izuaren aurkako botoia deitu diotenaz.

Durangoko Autodefentsa Feminista Asanblada
2019ko maiatzaren 24a

Eraso matxistak saihesteko, GPSdun geolokalizatzaile bat daraman gailu batekin ibiltzea proposatzen digute; geure burua arriskuan ikusiz gero, botoia klikatu eta udaltzainak gu “salbatzera” agertu daitezen.

Berria irakurtzean, hainbat galdera etorri zaizkigu burura: Nor kontrolatzen du aparatu honek? Nork dauka eraso sexisten erantzukizuna, edo gordinago esanda, nork erasotzen gaitu? Noiz jarriko da fokua erasotzaileengan? Zer behar dugu emakumeok* babestuak sentitzeko?

Paradoxikoki, botoia aurkeztu zuten astean bertan, gure herriko emakume* bat erasotua izan zen, bere mutil lagunarengandik. Bere etxean, bere ohean. Badirudi erasotzaileak ez direla soilik toki ilunetan edo mendian agertzen diren ezezagunak.

Indarkeriaren atzean, hau sostengatzen duen gizarte-egitura oso bat dagoela badakigu honezkero. Indarkeria matxistarekin amaitu nahi badugu, sistema heteropatriarkala suntsitu behar dugu, eta harreman osasuntsuak eta bizitza bizigarriak bermatuko dituen gizarte feminista eraiki. Bide honetan, errotiko neurriak exijitzen dizkiegu instituzioei; hezkidetza plan integral eta iraunkorrak, emakumeok ahalduntzera begirako proposamenak, erasoen erantzukizuna geure gain jartzeari uztea.

Indarkeria jasanez gero artatuak izango garen instituzioetan (polizia, osasun zentruak, zerbitzu sozialak…) formakuntza eskatzen dugu; salaketa jartzera goazenean oztopatuak ez izateko, gure kontakizuna zalantzan ez jartzeko, merezitako babesa eta tratu ona jasotzeko.

Emakumeok* zaurgarriak eta biktima potentzialak garenaren iruditeria elikatzen duten neurriek ez digute balio. Kontrol mekanismoek ez gaituzte sekula babestuko. Horregatik, autodefentsa feministan sakontzen jarraituko dugu, modu autonomo eta kolektiboan antolatzen eta ahalduntzen.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Durango  |  Autodefentsa feminista

Iritzia kanaletik interesatuko zaizu...
Eguneraketa berriak daude