Bi erakundeek "Espainiako zigorgabetasun eredu jasanezina" kritikatu dute, eta "egia, justizia, erreparazioa eta Estatuaren indarkeriaren biktima guztientzat ez errepikatzeko bermeak" eskatu dituzte. "Indarrak batu ditugu Estatuari erantzunak eskatzeko. Modu kolektiboan egiten dugu, jakitun baikara norabide onean egiten dugun urrats bakoitzak bidea ireki dezakeela erakundeek ahaztutako beste biktima askok zor zaien eta oraindik egiteke dagoen aitorpen integrala izan dezaten ", azpimarratu dute.
Ekimen horrek "Memoria Demokratikoari buruzko 20/2022 Legearen mekanismoak barne hartzen ditu, errepresioa jasan zutenen erreparazio moralerako eta memoria pertsonala eta familiarra berreskuratzeko eskubidea aitortzen baitu".
"Bi kolektiboen artean 40 eskaera izapidetu ditugu aldi berean errekonozimendu hori lortzeko, horien artean Gasteizen, Tarragonan, Basaurin, Iruñean eta Donostian eraildakoei dagozkienak. Hala ere, gaur iragarri dugun jarduera ez da prozedura honetara mugatzen soilik, Estatuak krimen horietan duen erantzukizun nagusi eta zuzena ofizialki aitortzeko eskakizunarekin batera dator ", adierazi dute.
Memoria Demokratikoaren Legeak, 2. artikuluaren 2. paragrafoan, "argi eta garbi esaten du botere publikoek Espainiak gai horretan berretsitako Giza Eskubideen nazioarteko itunen arabera interpretatuko dutela lege hau, hargatik eragotzi gabe, hala dagokionean, zuzenean aplikatzea".
"Horretan sakontzen du, halaber, Espainiako Konstituzioaren 10.2 artikuluaren edukia, Konstituzio horren 96. artikuluarekin lotuta baitago, bertan adierazten baita nazioarteko tratatuak bere barneko ordenamendu juridikoaren parte direla", gaineratu dute. "Dei publiko hau egiten diegu Espainiako Gobernuari eta presidenteari, maila gorenean adierazpen ofizial bat egin dezaten baldintza horietan, eta oraindik indarrean dagoen Sekretu Ofizialen Lege Frankistaren aldaketa burutzeko benetako konpromisoa har dezaten", adierazi dute bi ekimenek.
Gaineratu dutenez, eman beharreko pauso hori "ezinbestekoa izango litzateke, baina ez behin betikoa, gai oso garrantzitsuak zintzilik baitaude, hala nola, justiziarako benetako sarbidea, eta berdintasunezko eta inolako diskriminaziorik gabeko tratua lortzea, maila guztietan, giza eskubideen urraketa larrien biktima guztientzat, gaur egun Espainiako Estatuan gertatzen ez den bezala".
Azpimarratu dutenez, "Estatu benetan demokratiko bat administratu behar duen edozein Gobernuk ezin du alde batera utzi bere aparatu errepresiboek giza eskubideei egin diezaieketen eraso oro".
"50 urte bete dira Franco hil zela. Diktadorea duela mende erdi hil zen, baina frankismoa ez zen hil, dena 'lotuta eta ondo lotuta' utzi zuen, eta estatu-indarkeria sistematikoki praktikatzen jarraitu zen, zigorgabetasun osoz. Frankismo horren biktimak eta lekukoak gara, Franco gabe ", adierazi dute.
