1.500 euro arteko isunak LOMCEren aurka protesta egin zuten Iruñerriko ikasleentzat
Maiatzaren 27an LOMCEren aurka egindako ikasle greban poliziak izan zuen jarreraren aurka, bizikleta martxa egin zuten 50 ikasle inguruk maiatzaren 30ean, Ikasle Abertzaleek deituta. Poliziak identifikatu egin zituen eta bi hilabetera 750 eta 1.500 euro bitarteko isuna jaso dute gazteek.
Maiatzaren 27an mobilizazio handiak eta 27 atxilotu izan ziren Iruñerrian. Jasandako errepresioa eta “ikasleen kriminalizazioa” salatzeko, hiru egunera bizikleta martxa baketsua egin zuten ikasleek, LOMCEren aurkako zenbait kartelekin. Espainiako Poliziak eta Iruñeko Udaltzaingoak gerarazi eta 50 bat gazte identifikatu zituzten, protestarako baimenik ez zutela argudiatuta.
Isuna jasoko zutela jakinarazi zieten eta bi hilabetera hala izan da. 750-1.500 euro arteko zigorrei aurre egiteko laguntza ekonomikoa batzen hasiko dira Iruñerriko ikasleak. Oraingoz, bertako hainbat auzotako tabernetan itsulapikoak ezarri eta laguntza-bonoak atera dituzte.
Nafarroako Ikasle Abertzaleen bideoa
