Hizkuntza politika “sendoak” eskatu dizkie euskalgintzak instituzioei

  • Baionan egin dute agerraldia euskalgintzako 25 bat eragilek maiatzaren 15 honetan. Erakunde publikoen interpelazioaz gain, datorren urteko maiatzaren 15etik 25era iraganen den Euskaraldiaren berri emateko unea ere izan da.


2024ko maiatzaren 16an - 10:45
Maiatzaren 15ean Baionan egindako agerraldia. Argazkia: Euskalgintzaren Kontseilua

Euskaraldiarentzat urtebete eskas dela, Korrika bukatu berri den plazatik luzatu die instituzioei mezua euskalgintzak: "Aintzat har ezazue herritarren bultzada, eta eman urrats sendoak euskararen normalizazio eta biziberritzearen alde, eta, horrenbestez, hizkuntz berdintasunaren, justizia sozialaren, gizarte kohesioaren eta bizikidetzaren alde". Euskararen aldeko hizkuntza politika ausart horien beharra handia da, are gehiago ofizialtasunik gabeko Ipar Euskal Herrian zein Nafarroa Garaiko hegoaldeko partean. Hitza hartzerakoan, euskalgintzak oroitarazi nahi izan die euskara "hizkuntza minorizatua" dela eta horrenbestez, "hiztun komunitate minorizatua" garela euskaldunok.

Euskararen normalizazioaren eta biziberritzearen aldeko eskaera "gizarte adostasun zabalak" sostengaturikoa dela erranez abiatu dute agerraldia. Idurre Eskisabel Euskalgintzaren Kontseiluko idazkari nagusiak, Ane Elordi AEK-ko koordinatzaileak eta Irati Iziar Euskaltzaleen Topaguneko lehendakariak irakurri dute adierazpen bateratua, euskalgintzako ordezkari zonbaiten babesean: AEK, Euskaltzaleen Topagunea, Euskal Konfederazioa, Euskal Herriko Ikastolak, Euskal Hedabideak, Elkar, Berria, Elhuyar, Udako Euskal Unibertsitatea, Euskal Herrian Euskaraz, Maizpide Euskaltegia, Hezten Aisialdi Euskaltzalea, Karmel Aldizkaria, Konkolotx, Biga Bai, Mintzalasai, Bai Euskarari eta Eusko Ikaskuntza.

Korrikan islaturiko harrotasuna azpimarraturik, hegemonia hartzeko helburua plazaratu dute: "Euskal hiztun izan ala ez, harro zabaldu dugu lau haizetara ekosistema bat eraiki behar dugula euskararen bueltan: euskal komunitatea, euskara ardatz duen komunitatea".

Elkarlanerako gogoa berretsiz

Orain arte bezala, euskararen ezagutzaren, erabilpenaren eta sustapenaren alde lanean segitzeko asmo argia dute euskalgintzako eragileek, eta bide horretan hizkuntza politiketan eragiten jarraitzeko konpromisoa berretsi dute: "Xedetzat dugu euskararen erabileran eta sustapenean eragitea, eta garenaz eta egiten dugunaz harro gaudelako, elkarrekin eta elkarlanean jarraituko dugu euskarak lotzen gaituen Euskal Herri harroa eraikitzen".

Elkarlanerako aukera izanen dute, beraz, 2025eko maiatzaren 15etik 25era iraganen den Euskaraldia: "Hiztun komunitateak euskararen alde egin dezakeen ekintzarik erradikalena euskaraz aritzea da; inertzien eta erresistentzien aurrean, korrontearen kontra, euskaraz aritzea. Euskararen aldeko politikei bultzada sendoena, inoren zain egon gabe, ahal bezainbeste euskaraz bizitzea da. Euskaraldian, milaka ahobizi eta belarriprestek gure hizkuntza ohiturak aldatuko ditugu, nork bere inertziak apurtuz, eta konfort eremuetatik mugituz". Nazio mailako ekimen masibo horien garrantzia azpimarratzen bukatu dute prentsaurrekoa.


Kanal honetatik interesatuko zaizu: Hizkuntza politika
Euskara Ipar Euskal Herrian
Azken sokatirak, hizkuntza politika eraginkor baten alde

2024 urte hastapenean adostuko du ondoko urteetarako hizkuntza politika Euskararen Erakunde Publikoak (EEP). Azken inkesta soziolinguistikoaren emaitzak eta EEPk 2050ari begira egindako aurreikuspenak esku artean, alarma gorria pizturik du euskalgintza sozialak: ezin da orain... [+]


Europar Batasunean euskara, katalana eta galiziera ofizialtzearen erabakia atzeratu dute, eta Espainiako Kongresuan hasi dira erabiltzen

Euskalgintzaren Kontseiluak "atsekabez" hartu du berria, baina atzerapenaren ostean onartuko duten esperantza du. Bestalde, gaurtik aurrera hizkuntza horiek erabili ahal izango dira Espainiako Kongresuan. Kontseiluak kezkaz hartu du euskal alderdietako politikariek... [+]


2023-08-31 | Ilargi Manzanares
Andorrak gutxieneko katalan maila eskatuko du bertan bizitzeko

Andorrako katalanaren defentsarako lege berriak katalanaren oinarrizko maila eskatuko du bertan bizi eta lan egin ahal izateko. A2 titulua baino maila baxuagoa eskatuko dute.


Euskara, ofiziala Europan eta Nafarroan ez?

Ostegunean jakin genuen: Espainiako Gobernuak eskatu du galiziera, euskara eta katalana hizkuntza ofizialak izan daitezela Europako erakundeetan. Zergatik? Kataluniako alderdi politikoek behartu dute horretara, negoziazioetan.


Kontseilua: “Nafarroako Gobernu akordioa atzerapausoa da euskarari dagokionez”

Atzerapausoa. Horrela baloratzen du Euskalgintzaren Kontseiluak, hizkuntza auziari eta euskararen sustapenari dagokionez, Nafarroako Gobernu berria eratuko duten alderdi politikoek sinatu duten 2023-2027 legegintzaldirako akordio programatikoa.


Eguneraketa berriak daude