Hiru hilabetetan bi behargin hil dira Amurrioko Tubacex enpresan, guztira, bost langile azken bederatzi urteetan

  • Irailaren 18an zendu zen Tubacex taldeko Aceralavako lantegian -Amurrion- langile bat, eta enpresa bereko azpiegituretan hil zen ere 25 urteko gazte bat uztailean. Biak ziren aiaraldearrak, Laudiokoak. Enpresan ordezkaritza duten guztiek seinalatu dute prekarietatea dela heriotza horien atzean dagoena.

Irailean gertatutako heriotza salatzeko elkarretaratzearen irudia. Argazkia: Aiaraldea.eus

2019ko irailaren 27an - 09:45

Uda gogorra izan da bukatu berri dena Tubacex enpresan. Pasa den astean 59 urteko langilea hil zen bihotzekoak jo ostean, bere ardurak betetzen zituen bitartean. Antza, lanpostuan tenperatura altua zegoen eta bero kolpearen emaitza izan zen heriotza, oraindik argi ez dagoen arren. Eusetek enpresa azpikontratatuko langilea zen M. G. R. izeneko laudioarra.

Printzipioz, Tubacexek ukatu egin zuen zerikusirik izatea gertatutakoarekin, baina zenbait langile ordezkarik gogorarazi zuten enpresan jazotzen diren heriotzak lan istripuak direla.

Hori dela medio, hurrengo egunean mobilizazioak eta protestak egon ziren, baina parte hartzea ez zen apartekoa izan, aintzat hartuta uztailean ehunka lagun batu zirela Tubacex enpresan izandako beste istripua salatzeko. Zehazki, uztailaren 4an makina batek 25 urteko gazte bat harrapatu eta hil egin zuen Tubacex taldeak Laudion duen fabrikan eta gertakariari berehala erantzun zioten bere kideek.

Egunean bertan gelditu zuten ekoizpena beharginek eta hurrengo egunean ere faktoria hutsik egoteaz gain, sarreratik abiatu zen manifestazio jendetsua. Arratsaldean elkarretaratzea egon zen eta ondoren Ernai

gazte antolakundeko kideek Zumalakarregi etorbideko trafikoa moztu zuten protesta egiteko.

Prekarietatea jomugan

Hilabete gutxiren buruan bi hildako egoteak enpresa berean, derrigorrez, zerbait txarto dagoenaren seinale izan behar du. Gauzak horrela, uztailean jatorria seinalatu zuten sindikatuek: prekarietatea.

Langile ordezkariek azpimarratu zuten Tubacex taldearen politikak etekinak lortzera bideratuak daudela soilik, eta bazterrean ezinbesteko tresnak geratu direla: azpiegituretan segurtasuna bermatzeko inbertsioak, matxuratu diren piezak ordezkatzeko material egokiak, jende nahikoa lanak ganoraz betetzeko eta hutsuneak betetzeko, edota kontratu egonkorrak, beharginek ez ditzaten portaera arriskutsuak hartu enpresako zuzendaritza pozik egon dadin eurekin eta kontratuaren iraupena luzatu diezaieten.

Are gehiago, politika horiek guztiak bultzatu dituztenei izena eta abizena jarri zizkien langile batzordeak: Celestino Danis TTI eta Aceralavako operazio zuzendaria eta bere “morroiak” -beti ere, sindikatuen hitzetan-.

Edonola ere, udan jazotako heriotza horiei beste hiru gehitu behar zaizkie azken 9 urteetan.

Alde batetik, 2010ean Ugaoko gazte bat zendu zen Laudioko lantegian. 2012an bihotzekoa pairatu eta gero beste langile bat zendu zen altzairutegian. Gainera, 2013an azpikontrata bateko 41 urteko behargina hil zen Amurrion.

Enpresa ez da mugitu

Uztaileko heriotzak eskualde osoa astindu bazuen ere, eta nahiz eta ikasturtea beste gorpu batekin abiatu, Tubacex enpresako zuzendaritzak ez du inolako premiarik adierazi egoera horiei aurre egiteko. Izan ere, irailaren 30ean deitu du konpainiak bilera langile batzordearekin. Hau da, ia 3 hilabete igaro direnean lehen istripua gertatu zenetik.

Jarrera horrek bat egiten du enpresan ordezkaritza duten sindikatuek uztailean azaldutakoarekin. Laudioko gaztearen heriotzaren ostean Aiaraldea hedabidea harremanetan jarri zen guztiekin eta denek egin zuten bat puntu batean: ez zela neurri berririk hartu istripuak ekiditeko.


Kanal honetatik interesatuko zaizu: Lan istripuak
2024-02-27 | ARGIA
Langile bat hil da Arrasaten; urtea hasi denetik, 17

Astelehen arratsean gertatu da ezbeharra, Arrasaten, hiru metroko sakonerara erorita.


2024-02-15 | ARGIA
Langile bat hil da Olaztiko zementu-enpresa batean

Ostegun eguerdian gertatu da ezbeharra Cementos Portland enpresan, Olaztin. Urtea hasi denetik 15 langile hil dira Euskal Herrian.

 


Hiru egunetik behin langile bat hil da Euskal Herrian, urtea hasi zenetik

Durangon 47 urteko langilea hil da asteartean eta jadanik istripuz hildako 14. behargina da aurten Euskal Herrian, LABek emandako datuen arabera. Fumbarri lantegiko teilatuan lanean ari zela erorita hil da langilea eta azpikontrataturiko enpresa batentzat ari zen. Sindikatuek... [+]


2024-01-22 | ARGIA
Lau langile hil ziren Euskal Herrian aurreko astean

Urizaharreko harrobian lanean ari zela hil zen behargin bat joan den ostiralean, makina batek harrapatuta. Urtea hasi denetik, zortzi langile hil dira.


2024-01-18 | ARGIA
Behargin bat hil da Errenterian aldamio batetik erorita, urteko zazpigarrena

Urtea hasi denetik lanean hildako zazpigarren langilea da. Astebeteko epean, bost behargin zendu dira.


Eguneraketa berriak daude