Abenduaren 11n greba eguna izan da Hego Euskal Herriko hezkuntzaren arloan, Ikamak deituta. 60 eragilek baino gehiagok babesturik, manifestazioak antolatu dituzte Donostian, Bilbon, Gasteizen eta Iruñean eta milaka lagun elkartu dira. 

Goizean zehar ikastetxe eta unibertsitateetan piketeak egin dituzte, ikasleak mobilizazioetara batu daitezen, eta zenbait kasutan errepide mozketak ere egin dituzte.

Manifestazioen amaieran irakurri duten oharrean azaldu dutenez, ez dago behar bezelako "anbiziozko politika publiko askatzailerik" euskarak jasaten duen egoerari aurre egiteko, eta gogorarazi dute Euskal Herria hiru eremu administratibotan dagoela banatuta eta hizkuntza ofiziala ez den eremuetan are "zailagoa" dela egoera.

Zentzu horretan, egungo hezkuntza eredua "agortuta" ikusten dute, ez delako gai izan hizkuntza maila "duina" transmititzeko eta erabileran jauzi bat emateko. 

"Ikasleok lehen lerroan egon behar dugu"

Gazte antolakundeak, euskararen kontrako oldarraldi "judizial, mediatiko eta soziopolitikoari" erantzun bat eman behar zaiola iritzi du eta hezkuntza ereduen erdigunean ere auzi hori dagoela. Hala, euskararen biziraupenerako "independentzia eta euskal hezkuntza sistema propioa" ezinbestekoa direla azaldu zuen Ikamak mobilizazio eguna aurkezterakoan.

"Guretzako gaurko eguna bada mobilizazio eta borrokarako egun bat. Egungo konstestuan aurkitzen gara euskararen biziberritzearen agortze fasean ez ezik, atzerapen egoera batean. Euskara jasaten ari den oldarraldiak logika atzerakoia hartzen du. Gaurko eguna bada ikasleria kontzientziatu eta bereziki mobilizatzeko egun garrantzitsua", azaldu du Aimar Loiti Ikamako kideak, mobilizazioen aurretik Hamaika telebistan egindako elkarrizketan.

Elkarrizketa berean, Garazi Ubiriak azpimarratu du euskara "larrialdi linguistiko batean" dagoela: "Horren adierazle da UEMAk argitaratu duen azken diagnostikoa, non aipatzen den arnasguneak hamar urteren buruan desagertuko egin daitezkeela. Beharrezko ikusten dugu euskararen egoera hezkuntzatik ere lantzea. Ikasleok euskararen zapalkuntza lehen mailatik bizitzen dugulako. Ikasleok lehen lerroan egon behar dugu".

Ostegun honetarako "olatura batzeko" eta kalera ateratzeko deia egina zuen Ikamak. Hala, manifestazioak 12:00etan abiatu dira, Bilbon Arriagatik, Donostian Bulebarretik, Gasteizen Elurretatik eta Iruñean Hezkuntza Departamentutik, eta jendetza elkartu dute oihu, bengala eta aldarrien artean.