Ikastetxeak egokitu behar direla umeen beharretara eta ez umeak ikastetxeetara, dio ama honek, eta fardela uzteko nahikoa heldutasun lortu ez duten umeei pixa eta kaka aldatzeko pertsonak ziurtatu behar lituzkeela eskolak. Hori ez dela irakasleen funtzioa erantzun du baten batek, eta etxeko lanak egin behar dituztela gurasoek udan, haurrak prestatzeko.

Kontuak kontu, fardela busti edota zikindu duen umea nekez utziko dute aldatu gabe ikastetxeko profesionalek, baina ez dute erraza: 3 urteko ikasgeletan ez dago fardela aldatzeko tokirik, eta irakasleak haur horrekin komunera joan behar badu, gelako gainerako guztiak bakarrik utziko lituzke, eta hori, jakina, ez da posible.

Fokua zabalduta, haurraren garapen erritmo ezberdinez, eskolaren funtzioez, baliabide pertsonal eta fisikoez (eta horien erabileraz) eta irakasle eta gurasoen arteko hartu-emanaz gogoetatzeko bide ematen du eztabaidak, besteak beste.