Astelehen goizaldean hamar pertsona atxilotu ditu Guardia Zibilak Katalunian. Europa Press informazioa agentziak eman du berria, polizia iturriak aipatuz. Agentziaren arabera, Guardia Zibilaren operazioa “bortxazko ekintzak prestatzen ari ziren independentisten” aurkakoa da, eta atxilotuak Errepublikaren Defentsarako Komiteekin (CDR) lotura lukete. Operazioa Espainiako Auzitegi Nazionaleko Seigarren Epaitegi Zentralak agindu du. Ikerketa urte bete lehenago hasi zuen auzitegiak. Atxilotuak hurrengo egunetan deklaratuko dute Madrilen. Madrildik etorritako laguntzarekin, 500 bat guardia zibilek parte hartu dute operazioan.

Operazioa Vallès eskualdean zentratuta dagoela eta 500 Guardia Zibil mobilizatu direla argitaratu du La Directa hedabide katalanak. Etxeetako batean behintzat Guardia Zibila burua estalita eta atea apurtuz sartu da, Directari lekukoek adierazi diotenez.

Operazioa zabalik

Guardia Zibilak agiri batean zabaldu duenez "leherketak egiteko lehengaiak atzeman" dizkiete atxilotuei, eta baita "dokumentazioa" eta "material informatikoa" ere. Guardia Zibilaren arabera, "CDRetako kideek antolatutako ekintza biolentoak planeatzen ari ziren". Espainiako Barne Ministro Fernando Grande Marlaskak operazioa baieztatu du, eta atxiloketa gehiago egoteko aukera ez du baztertu. Operazioak uztailean CDRen eta ezker independetistaren Arran gazte antolakuntzaren aurka egindakoarekin "antzekotasunak" dituela adierazi du Marlaskak.

Mollet del Vallès-en, Cerdanyola-n eta Sabadellen atxiloketa bana behintzat izan dira.

Guargia Zibilak berak zabaldutako bideo honetako irudiak erabili ditu "lehergailuak prestatzeko materiala" topatu duela esateko.

Erreakzioak Katalunian

Berria zabaldu eta jarraian operazioaren aurkako mezuak zabaldu dituzte indar independentista nagusi guztiek. Kataluniako CDRek, Twitter saretik, “Espainiako Erreinuko indar errepresiboek jo-puntuan” jarri dituztela salatu dute, baina haien bidean berretsi dira: “Bereizi gabeko miaketak eta atxiloketak egin arren, ez dute geldituko erabakimena duen herri borrokalari bat”. Deituko diren mobilizazioetara adi egoteko eskatu dute CDRek.

Omnium Cultural elkarteko presidente Marcel Maurik gaurko atxiloketak iraganeko beste batzuekin alderatu ditu: "Dixan operazioa, Pandora operazioa, Tamara eta Adri operazioa... eta beste hainbeste operazio Auzitegi Nazionalaren aginduz, gaurkoa bezala, goizaldean, eskubideak urratuz eta mugimenduak kriminalizatuz. Atxilotu eta ondoren frogak bilatzen dituzte". ANCk ere “kriminalizazio” hitza erabili du, eta operazioa buruzagi independentisten aurkako epaiketaren sententziaren hurbiltasunarekin lotu du.

Alderdi politikoen esparruan, CUPek salatu du estatuak “beldurra” behar duela “edozein disidentzia mota ezabatzeko”. “Bakarrik nahi gaituzte, elkarren ondoan izango gaituzte”, idatzi dute. ERCko Gabriel Rufianek “gau erdian haien aurkako frogak aurkitzeko” pertsonak atxilotzea salatu du, demokrazian “justu alderantziz” gertatzen dela nabarmenduz. Galdera bota du: “Nor izango da hurrengoa?”. JxCat alderdiko parlamentari Aurora Madaulak operazioaren kritikari autokritika gehitu dio: “Gu zerrendengatik eta aulkiengatik borrokan ari garen bitartean,haiek errepresioa eta mugimendu independentistaren ilegalizazioa justifikatuko duen kontakizuna eraikitzen ari dira".

Une berezia Katalunian

Atxiloketak une oso berezian agindu ditu Auzitegi Nazionalak. Urriaren lehenengo hamabostaldian espero da erreferendumaren arduradun politikoen aurkako epaiketaren sententzia. Zigor gogorrak aurreikusten dituzte Katalunian, eta erantzun masibo, bateratu eta irmoa adosteko saiakerak egiten ari dira indar independentistak. Nagusi den zatiketa eta liskar giroa gainditzeko aukera bezala ikusten dute askok sententzia. Poliziaren arabera, hain zuzen ere, urriaren 1eko erreferendumaren bigarren urtemugaren eta sententziaren arteko epean burutu behar omen zituzten bortxazko ekintzak atxilotuak. Ez dirudi, oraingoan ere, intentzionalitate politikorik gabeko operazioa abiatu duenik Espainiako Estatuak.