Koronabirusa egiaz aitorturikoak baino hildako gehiago eragiten ari dela gero eta agerikoagoa da, estatistika eta datuen arabera. Hego Euskal Herrian ere desfase handia dagoela jakin da. Datuen ezberdintasun horren atzean, zahar-etxeetan gertatzen ari denak ere badu zerikusia askoren ustez eta Galdakaoko hiru egoitzetako kasua izan daiteke horren adibide.

Galdakaoko Udalak salatu du zahar-etxe batzuetan koronabirusagatik hildakorik ez dutela izan esan arren, beraiek eskura dituzten informazioengatik badakitela heriotzak gertatu direla. "Kezkatuta eta haserre" mintzatu zaizkie Geuria aldizkariari: "Berariaz eskatuta datuak jaso ditugunean ere, kasu batzuetan errealitatea are larriagoa dela konturatu gara", diote Udaletik.

Esaterako, Aperribaiko egoitzan, 12 hildako izan direla baieztatu diete, baina "14 heriotza zenbatu dituzte beste batzuek". Datuak biltzeko zailtasunak ere salatu ditu Galdakaoko Udalak, egoitzetan telefonorik hartzen ez zutelako.

Egoitzako langile, zuzendaritza, egoiliarren senide eta Bizkaiko Aldundiarekin harremanetan jarri dira egoera bideratzeko, baita neurriak hartu eta gardentasun gehiago eskatzeko ere.