Sei milioi musulman baino gehiago bizi diren lurraldean, “islamaren ideologiaren aurkako gerra” bere egin du Frantziak, Barne ministroaren esanetan. Macronek ere irakaslearen hilketa aprobetxatu du beste behin Frantziako Errepublikaren baloreen “defentsa irmoa” egiteko, separatismo musulmanaz hitz egiteko eta Mahomaren karikaturak erakustearen aldeko aldarria egiteko, adierazpen askatasunaren izenean. Europako kultur talka oinarrian duten eztabaida zaharrak mahaigaineratu ditu berriro ere gertaerak.

Musulman ugarik erasotzat hartu dituzte presidentearen hitzak, baita profetaren karikaturak defendatzea ere, eta protesta jendetsuak egin dituzte nazioartean. Frantziako produktuak boikoteatzera ere deitu dute, Macron eskuin muturraren botoak irabazi asmoz ari dela iritzita. AEBren antzera, Frantzia etsai bila ari dela uste dute, herrialde musulmanetan izandako esku-hartzeak gogoan. Giza eskubideak defendatzea argudiatuta, neokolonialismoa eta negozioa egitea leporatu diote.

Musulmanak kriminalizatzeko bideo faltsuak

Garai bertsuan, whatsapp eta sare sozialen bidez komunitate islamikoa kriminalizatzea eta migratzaileen aurkako gorrotoa indartzea helburu duten bideoak zabaltzen ari direla salatu dute. Bideo hauetan eliza, estatua edota gurutze kristauak erasotzen ageri dira, eta esaten da musulmanak direla horretan ari direnak, baina ez dira oraingo irudiak eta gainera ez da egia herritar musulmanak direnik bideoan azaltzen direnak.

Muturreko islamiarren aurkako legea

Testuinguru honetan, abenduan Frantziako Gobernuak atera nahi duen legea aipatu du Macronek: besteak beste, legeak behartuko du haur guztiak 3 urterekin eskolaratzera –Frantziako Estatuaren baloreen araberako hezkuntza ziurtatzeko haurrei–; neurriak jarriko ditu mezkitak eta mezkiten finantzazioa kontrolatzeko; eta debekatu egingo da Maroko, Tunez eta Aljeriatik imanak Frantziara joatea, imanen gaineko kontrola handituz.