“Gaurko egunak esanahi berezia dauka, astelehenean Erregeak abdikatzeko erabakia eman ostean”, adierazi du Espainiako tronuaren oinordekoak bere hitzaldiaren hasieran. Agerraldia probestu du adierazteko Espainiako parlamentuaren prozedura errespetatuko duela eta “Espainia zerbitzatzen” jarraitzeko borondatea daukala.

Nafarroari hitzak

Juan Carlos Borboikoaren semeak Nafarroarentzat ere izan ditu hitzak. “Gure aberria den Espainiaren jatorrizko orubeetako bat” hitzak erabili ditu herrialdea definitzeko eta gaineratu du “gertutik” jarraitzen duela  “Foru Erkidego honen errealitatea”. Leiren egindako hitzaldia baliatu du Nafarroaren espainiartasuna defendatzeko.

Espainiako Estatuak bizi duen egiturazko krisiaz iritzia emateko ere probestu du Espainiako printzeak. “Garai zailak” bizi dituztela esan ondoren, “onura komuna” lehenestea beharrezkotzat jo du.