ARGIA.eus

2021eko urriaren 15a

"Ez dugu irudikatzen Amazonen praktikak noraino iristen diren"

  • Merkatua tenkatu eta bereganatzeko Amazon zer egiteko prest dagoen –eta zer egiten duen– ba al dakigu benetan? Pentsatu al dugu kontsumo eredu horrek ekartzen dituen kalteen inguruan? Horri buruz gogoetatzeko solasaldia antolatu du Behe Bidasoako Eskubide Sozialen Kartak, Oiartzunen Amazonek egoitza irekitzeko asmoa agertu duela-eta. “Soluzioak egon badaude, baina denon artean eraiki behar ditugu”.

Mikel Garcia Idiakez @mikelgi
2021eko irailaren 21a

Saltzen ez dituzten produktuak erretzen dituztela, behin merkatua monopolizatzen dutenean drone bidez banatzen hasiko direla… eta gisako jardunbideez aritu zaigu Claudia Romero, Behe Bidasoako Karta Sozialen kidea. Eurek antolatu dute ostegun honetarako “Amazon, ez hemen ez inon” solasaldia, Irungo Palmera Montero gunean, arratsaldeko 18:30ean.

Praktika horiek ezagutaraztea da solasaldiaren helburuetako bat, baita Amazon ereduak duen eraginaz hitz egitea ere, lan baldintzen prekarizazioan, eskubideen galeran, ingurumenean, tokiko merkataritzan, lurralde ereduan…

Alternatibak eraikitzen

Kritikatik harago, kontzientzia hartu eta bestelako ereduak izan badirela ere azpimarratu nahi dute, horien aldeko apustua egin dezakegula. “Alternatibak erakutsiko ditugu, eta horiek aurrera eramateko ditugun zailtasunak, bidea ez baita arrosa kolorekoa, eta horregatik da inportantea denon inplikazioa: soluzioak egon badaude, baina denon artean eraiki behar ditugu”, dio Romerok.

Soluzio horien ordezkariek ere hitza hartuko dute solasaldian, hala nola Zaldunborda Gelditu plataformako kide batek (eskualdeko merkatari txikien ordezkari) eta Badoa banatzaileen kooperatiba sortu berriko kide batek.

Oiartzunen gune berria Amazonentzat?

Amazonek Oiartzunen gune bat irekitzeko asmoa zertan den galdetu diogu Romerori. Geldirik dago afera, ez dago berririk, “baina halako enpresekin inoiz ez dago jakiterik, daukaten gaitasun finantzario eta estrukturala hain da handia egun batetik bestera egin dezaketela jauzia”. Dena den, argi utzi nahi izan digu mezu nagusia: “Amazon, ez hemen ez inon”.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Amazon kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude