Etxeratek salatu du “euskal presoak hilobi komun batera” edo “heriotza zigorra” bezalako esaldiak dituzten gaztelaniazko pegatinaz beteta agertu dela Hernanin duen egoitza. Familiartekoen elkarteak azpimarratu du ez dela gertakari bakana.
Elkartearen “kriminalizazioa” bilatzen ari direla esan dute, eta Jone Artola Bilboko txupineraren kasua jarri dute jazarpenaren adibidetzat. Carlos Urquijo Espainiako Gobernuaren EAEko ordezkariak hartutako erabakiaren aurrean, oroitarazi dute Etxerat “guztiz publikoa, zilegia eta legala” dela.
Halere, gaineratu dute “erasoen gainetik euskal preso politikoen eskubideen urraketak salatzen” jarraituko dutela.
Ultren bisita Realaren partiduarekin
Etxeraten egoitzako ekintza inork bere gain hartu ez badu ere, Madrildik eta Lyondik Donostiara futbolzale eskuindarrak etorri diren egunean gertatu da.
Beste gertakari batzuk ere egon dira honen harira. Ultras Sur-eko kideek pankarta bat zintzilikatu dute Irunen Juan Guerra (Aitor Zabaleta hiltzeagatik kondenatua), Josué Estébanez (Carlos Palomino hiltzeagatik kondenatua) eta Esteban Morillo (Clément Meric hiltzeagatik kondenatua) kideen askatasuna eskatuz.
Bestalde, atzoko egunez jokatu zen Reala-O.Lyon partidaren aurretik Donostiako Alde Zaharrean eta Amaran istiluak izan ziren Ultras Sur-eko eta errealeko zaleen artean. Alde zaharrean Madrilgo eta Lyongo hirurogei bat ultra sartu ziren borra eta makilekin, eta tabernetako aulkiak bota zituzten. Ikatz kaleko Urka Mendi tabernan izan ziren istilurik handienak, eta gutxienez lau zauritu daude.
Ertzaintzak kanpoko zaleak Artzai Onaren plazan elkartu zituen zelaira kontrolpean babestuta eramateko. Bidean, ordea, Amara auzoan berriz ere liskarrak piztu ziren talde batek botilak bota zizkienean. Poliziak gomazko pilotak jaurtiz erantzun zien.
Espetxe eskaera AVT biktimen elkarteak egin du eta, horren bidez, presoen ongi-etorriak antolatzeaz akusatutako sei pertsonari bederatzi urteko espetxe zigorra eskatzen zaie.
Badira sei-zazpi urte kartzelan dauden presoek euskara ikasteko duten eskubidea bermatzeko helburuarekin, lanean aritu den euskara-irakasleen sare bat: Presoen Euskara Irakasleen Taldea.
Espainiako Auzitegi Nazionaleko Manuel Carcía Castellón epaileak sei pertsona epaituko ditu Ongietorrien auzian: Antton López Ruiz Kubati, Kai Saez de Egilaz, Pipe San Epifanio, Haimar Altuna, Oihana Garmendia eta Oihana San Vicente. Guztiak Sortuko kideak... [+]