Ganbarak 2017an antolatutako kafe transmisio batean gurutzatu ziren alde batetik Lohitzüne-Oihergin urte luzez landutako Xemeteia etxaldea norbaiti transmititu nahi zioten Chantal eta Jean-Bernard Pocheluk eta bestetik laborantza lurretan instalatu nahi zuten Sabrina Larzabal eta Julen Perezek. Lehen biak erretreta adinera iritsiak ziren eta beren baserriarentzako segida bilatzen zuten, galdu ez zedin. Bi laborari-nahi gazteek –ez bata eta ez bestea laborari familietako haurrak– etxalde bat behar zuten beren proiektua han abian jartzeko: kriaxera arrazako ahateen haztegia.

EHLGk bere webean kontatu du zein bide egin duten bi bikoteek baserriaren transmisioa egiteko eta kazetariek ere ikusi ahal izan dute etxaldea gertutik, protagonistak ezagutzeko aukerarekin:

EHLGko arduradunek esan dutenez, "kasu konkretu honek, Euskal Herriko Laborantza Ganbarak etxaldeetan segurtatzen duen hurbileko lana erakusten du. Beharrezko lana, etxalde anitz eta baliabideak, laborariak eta kontsumitzaleak errespetatzen dituen laborantza modeloari indar eman nahi badiogu. Lan hori osoki betetzeko, bere finantza ahala segurtatu behar du elkarteak".

Diru-bilketan lagundu nahi duenak orri honetan dauka errezki egiteko aukera. EHLGk bermatzen du bai instituzioetatik lortzen duen eta bai herritarrek borondatez ematen dioten diruarekin saiatzen dela laborantza herrikoiaren gaurko eta biharko desafioei aurre egiten hala nola hauei: "Desafio klimatikoa eta trantsizio baten beharra, berotegi efektu gas gutiago botatzen duten laborantza praktikeri buruz; balio erantsi gehiago sortzen duten ekoizpen sistema jasangarriak garatu; laborantza lurrak babestu, gure lurraldeko laborarien lanari segurtasuna ekartzeko; eta  laborari ofizioari irudi ona eman, laborarien baitan bai eta ere herritar guzien baitan",