Tasa turistikoa ostatu batean gaua igarotzen duen turistak ordaintzen duen zergari deitzen zaio, eta bildutako dirua “turismo jarduerak eta azpiegiturak hobetzera” bideratzen da, EITBren esanetan. Eusko Jaurlaritza aste honetan hasi da Araba, Bizkaia eta Gipuzkoan neurria aplikatzeko lehen urratsak ematen: zerga aztertuz eta horren erradiografia eginez. Munduko 137 hiritan aplikatzen da dagoeneko, eta laster Espainiako Estatuko hainbat erkidegotan ere egongo da indarrean.

Oraingoz, bi dira zerga turistikoa kobratzen duten autonomia erkidegoak: Katalunia (2012tik) eta Balearrak (2016tik). Baina beste erkidego batzuetan ere iragarri dute tasa turistikoa onartuko dutela: Valentzian 2024an sartuko da indarrean, eta EAEn bezala, Sevillan, Malagan eta Granadan ere zerga jartzea aztertzen ari dira.

Donostiako Udala “tasa turistikoa ezartzearen alde” dagoela adierazi du prentsa ohar bidez. Udaleko Turismo zinegotzi den Ernesto Gascok adierazi du azken urteotan Donostiak izan duen bisitari kopurua nabarmen hazi dela: “Zentzuduna da, beste turismo leku batzuetan gertatzen den bezala, tasa bat sortzea, hiriaren beraren onuragarri”.