ARGIA.eus

2020ko urriaren 25a

Espainiako Gobernuak Errege Etxearekin negoziatutakoa: ezkutuan ihes egitea eta informaziorik ez ematea

  • Felipe VI.arekin izandako elkarrizketen edukia “konfidentziala” dela argudiatu du Pedro Sanchezek presidenteak. Kazetarien aurrean adierazi du ez dakiela non dagoen Juan Carlos I.a, eta “babes osoa” adierazi dio monarkiari.

Mikel Eizagirre
2020ko abuztuaren 05a
Argazkia: Wikimedia Commons

Pedro Sánchezen exekutiboa borboiaren erbesteratzearen inguruko xehetasunak ezkutatzen ari da. Espainiako Gobernuak erakunde guztien "gardentasuna" defendatu badu ere, Felipe VI.a erregearekin izan dituen negoziazioen nondik norakoak azaltzeari uko egiten dio behin eta berriz. Ez du aitortu nahi izan Juan Carlos I.a beste herrialde batera joatea Espainiako Gobernuarekin adostutako ebazpena izan den ala ez, beste hainbat konturen artean.

Elkarrizketa horien data, lekua eta testuingurua argitzeke dago oraindik, baita horien existentziaren inguruan informazioa zutenen pertsonak ere. Astearte honetan Pablo Iglesias presidenteordeari eta Podemoseko gainerako ministroei erabakia ez jakinaraztea leporatu dio Irene Montero Berdintasun ministroak Sanchezi. Dena den, ez dago alderdi moreko gobernukideek ezer ere ez zekitela baieztatzeko taxuzko arrazoirik. Bestalde, errege ohiaren segurtasun-gastuak ordaintzen dituen egungo diru-iturria eta Juan Carlos I.aren kokaleku ofiziala oraindik ezezagunak dira, gizartearen gehiengoarentzat behintzat.

Astearte honetan, Sanchezek ez du erabaki historikoaren inguruko daturik eman nahi izan Moncloa Jauregian eman duen ikasturte politikoaren balantzea egiteko prentsaurrekoan. Hasierako hitzaldiaren ostean, agerraldia ezinezko elkarrizketa bihurtu da errege ohiaren nondik norakoak ezagutu nahi dituzten kazetarien eta Espainiako Gobernuko presidentearen artean.

Behin eta berriz galdetu diote ea errege emerituaren helmuga ezagutzen duen. Sánchezek informazio hori “ziurtataezina” dela erantzun du. "Garrantzitsuena da Juan Carlosek esan duela Fiskaltzaren eta Justiziaren esku utziko dutela", azpimarratu du Sanchzek, erregearen abokatuak astelehenean bertan kaleratutako komunikatua argudio gisa baliatuz. Espainiako Gobernuko presidenteak ministroei ez die azalpenik eman errege emerituaren irteera ezkutatzeko ustezko irizpidearen inguruan .

"Estatuko buruaren eta gobernuko presidentearen arteko bulegoetako gaiak diskretuak eta isilpekoak dira. Guk Errege Etxeak hartzen duen erabakia errespetatzen dugu, distantziak markatzen baititu irregulartzat jo daitezkeen jokabide batzuen gainean. Ez dut beste ezer esateko", azpimarratu du Pedro Sánchezek kazetariren batek errege ohiarekin izandako negoziaketei buruz galdetu diotenean.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Espainiako monarkia ezbaian kanaletik interesatuko zaizu...


Azkenak
EGILEA
Argia buletina
Egunaren laburpena
zure e-postan
Eguneraketa berriak daude