ARGIA.eus

2021eko urriaren 20a

Errusiatik bidalitako bi hegazkin bete laguntza humanitario iritsi dira Kubara

  • Errusiatik laguntza humanitarioz beteriko bi AN-124 hegazkin heldu dira igande gauean Kubara, elikagaiak eta COVID-19 gaitzetik babesteko baliabideekin.

Lander Arbelaitz Mitxelena @larbelaitz
2021eko uztailaren 26a
Kubara heldutako hegazkinetako bat. (Argazkia: Prensa Latina)

88,8 tonako karga bidali dio Errusiako Gobernuak Kubakoari eta igandean heldu da Habanako aireportura. Gari-irina, kontserba latak, eguzkilore olio findua eta erabili eta botatzeko milioi bat musuko kirurgikok osatzen dute bidalketa, Prensa Latina agentzia kubatarrak zabaldu duenez.

Harrera ekitaldian, Betsy Diaz Kubako Barne Merkataritzako ministroak eskertu egin dio keinua Errusiako gobernuari, Kubako herriaren, alderdiaren eta agintarien izenean.

Ministroak adierazi du garrantzi berezia duela dohaintzak, herrialdeko azken aldiko protestak medio. "Gure herrialdea une konplexuak bizitzen ari da COVID-19aren aurkako borrokan, egoera konplexuagatik". Errusiak Kuban duen enbaxadore Andrei Guskovek nabarmendu du uharteak AEBen blokeo ekonomiko, komertzial eta finantzarioari egin behar diela aurre COVID-19ari aurre egiten ari denean ere.

Guskovek aurreratu du Errusia eta Kuba era koordinatuan lanean ari direla sendagaien behar bereziak ezagutzeko, eta datozen egunetan beste karga bat bidaliko dutela Moskutik sendagaiz betea.

Egun bertsuetan Hego eta Ertamerikako Estatuek osatzen duten Celac komunitateak 800.000 xiringa bidali dizkio Kubari pandemiari aurre egiteko estrategiaren barnean.

Bi norabidetako elkartasuna

Kuba laguntza humanitarioa jaso du AEBetako Gobernuak inposatu blokeoaren ondorioz zenbait hornigai lortzea zail duelako. Egoera horretan ere, ordea, mundu osora mediku brigadak bidaltzen jarraitzen du COVID-19ari aurre egiten laguntzera. Gaur egungo datuak ez badakizkigu ere, 2020an, mundu osoko 60 herrialde baino gehiagotan zeuzkaten laguntza programak, ia 40.000 kolaboratzailerekin, horietatik ia 20.000 medikuak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Kuba  |  Errusia  |  Koronabirusa

Kuba kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude