Sindikatuek eta Kluben Elkarteak emakume futbolarien greba desblokeatzeko akordio bat lortu dute astelehen eguerdian Madrilen eginiko bileran. Adostutakoaren arabera, lan hitzarmena beranduenez abenduaren 20an sinatuko dute, eta futbolariek ordura arteko partidak jokatzeko konpromisoa hartu dute.
Futbolariek urriaren 22an egin zuten greba deialdia, jokalarien %93aren babesarekin, eta joan den asteburuan hasi zuten etenaldia. Ligako talde guztietako jokalariek hartu zuten parte greban, eta ez zen jardunaldiko partida bat bera ere jokatu. Realari igandean Zubietan eta Bartzelonaren aurka jokatzea zegokion.
Gatazkako bi alderdien desadostasun nagusia jokalarien lanaldiaren iraupenari zegokion, eta horrek hitzarmen berrirako elkarrizketak apurtu zituen. Lanaldia gutxienez %75ekoa izatea eskatzen dute futbolariek, eta kluben elkarteak —bertan dira klub guztiak Athletic, Bartzelona eta Tacon izan ezik—, berriz, jardun erdian jarri zuen bere muga.
Orain, ordea, badirudi patronala jokalarien eskaerari erantzuteko prest dagoela. Gauzak horrela, akordioa sinatuz gero, ligako futbolari guztiek urteko 12.000 euroko soldata gordina jasoko lukete.
Asteazkenean atxilotutako Indar Gorriko 61 kideak libre utzi ditu Iruñeko Instrukzioko 4. epaitegiak, behin-behineko askatasunean eta kautelazko inongo neurririk gabe.
Espainiako Polizia Iruñean, Sevilla eta Madrilen egiten ari den operazio baten barnean atxilotu dituzte. Iazko urrian Betis-Osasuna partidaren aurretik egondako istiluak ikertzen ari dira.