Asteartean egindako prentsaurrekoaren bidez, Bake Bideak eta Bakegileek mobilizazio berriak iragarri dituzte, Ion Parot eta Jakes Esnal euskal preso politikoen egoerarekin lotuta. Mobilizaziook urte hasierarekin abiatutako fase berriaren baitan kokatzen dira. Izan ere, Bakebideak-ek azaroan jakinarazi zuenez, “ofentsiboagoa eta determinatuagoa” den dinamikari ekingo zioten 2022arekin batera. Arrazoia: euskal preso eta iheslarien egoerari dagokionez azken urtean aurrerapauso esanguratsurik eman ez izana.

Maiatzean dituzte auzi saioak Parot eta Esnalek; lehenak maiatzaren 13an, eta bigarrenak maiatzaren 19an. Bi egun horietan elkarretaratzeak egingo dituzte, 13an Baionan eta 19an Donibane Lohizunen, helburu argiarekin: "Adi garela adierazteko eta baldintzapeko askatasun horien aplikazioa aldarrikatzeko".

Ekainaren 11n, aldiz, mobilizazioa deitu dute Baionan. Aurreikuspenen arabera, ordurako auzi saioen erabakiak jasoak edo jasotzeko gertu egongo baitira. Anaiz Funosas Bake Bideako presidentearen hitzetan, "zigor politika egokitu batek, Ion eta Jakesen baldintzapeko askatasuna ahalbidetu behar du". Alabaina, erabakiek presoen alde egin ezean, udan "Euskal Herri osoa blokatzeko ekintza" egingo dutela jakinarazi dute.

Iragarritakoez gain, datozen asteetan ekinaldi desobediente gehiago egingo dituztela aurreratu dute.

Hautetsientzat mezua

Frantziako presidente berria hautatzeko bigarren buelta gainean dela egin dute agerraldia, eta unea baliatu dute agintariei ere zuzentzeko: "Hautetsi izango direnek, bake prozesuaren aitzinamendu beharraren urgentziaren neurria hartu behar dute eta hauen agendan lehentasunez sartu. Gizarte zibilak Euskal Herrian dituen balio demokratikoekiko atxikimendua adierazi behar dute, argi eta garbi. Ez diogu utziko hurrengo gobernuari axolagabetasun-jarrera bera hartzen".

Ekaineko hauteskunde legegileetako hautagaiak ere interpelatu dituzte, adieraziz publikoki gonbidatuko dituztela "bake prozesuaren aitzinamenduaren beharra eta duten konpromisoaren berri ematera".