‘Egunkaria’ren sorrerari buruzko ‘Gaur irekiko ditu ateak’ filma estreinatu dute Docs Barcelona jaialdian
Docs Barcelona nazioarteko film dokumentalen jaialdian estreinatu da Euskaldunon Egunkariaren hasiera kontatzen duen Gaur irekiko ditu ateak, aste honetatik aitzina Euskal Herrian ere ikusi ahal izango dena. Eriz Zapirainen lana Latitud atalean lehiatu da Espainiako eta Latinoamerikako beste bost finalistarekin.
Hamaika Telebistak ekoiztutako 88 minutuko dokumentalean bildu ditu Zapirainek 1990ko abenduan argia ikusi zuen Euskaldunon Egunkariaren sorreran parte hartu zuten protagonistetako askoren lekukotzak, kontatuz euskarazko lehenbiziko egunkariaren genesia eta hasierako urratsak, trailer honetan aurreratzen dutenez:
Bartzelonako festibalean izan ziren Zapirain zuzendaria eta dokumentalaren protagonista nagusietakoa den Iñaki Uria, zine kritikoekin eta Kataluniako ikusleekin iritzi-trukean.
Euskaldunon Egunkaria itxi zutenean elkartasun handia iritsi zen Kataluniatik, eta filmaren arduradunek deklaratu dutenez “Kataluniarrek, eta zehatzago bartzelonarrek, ez dute hutsik egin berriro ere egin eta Euskaldunon Egunkaria ardatz duen zitara hurbildu dira".
Gaur irekiko ditu ateak aste honetatik aurrera ikusi ahal izango da Euskal Herrian: ekainaren 2an Gasteizen hasirik, estreinatuko da 3an Gernikan, 6an Donostia eta Bilbon, 9an Iruñean eta 17an Lapurdiko Urruñan.
