Berria egunkaria arduratu da Euskaldunon Egunkaria-ren hemeroteka digitala osatzeaz, Gipuzkoako Foru Aldundiaren laguntzaz. Era berean, Donostiako Koldo Mitxelena Kulturuneak eta Gureak enpresak parte hartu dute proiektuan.

Koldo Mitxelena Kulturuneko hitzaldi aretoan aurkeztu dute proiektua. Denis Itxaso Gipuzkoako Kultura diputatua eta Joan Mari Torrealdai Euskaldunon Egunkaria-ren lehendakaria izan dira bertan, Koldo Mitxelenako ordezkariekin batera.

1990eko abenduaren 6an argitaratu zen Egunkaria-ren lehen zenbakia, eta azkena 2003ko otsailaren 20an. Orduan Guardia Zibilak Espainiako Auzitegi Nazionalaren aginduz, itxiarazi baitzuen euskaldunon egunkari bakarra. Hamabi urte horietako zenbakiaren eduki guztiak sarean daude ikusgai Egunkaria-ren hemeroteka digitalean.