Trumpek egindako iragarpena herrialdearen krisialdi gorenean heldu da. Gobernuak pandemiaren txarrena pasatu dela adierazi badu ere, datuen gorakadak ez du indarrik galdu. Dagoeneko 787.000 kutsatu daude herrialdean, eta 42.000 hildakotik gora. Horri ekonomiaren gainbehera gehitu behar zaio, izan ere AEB munduko liderra den sektoreak, petrolioarenak, behea jo du.

Koronabirusa kanpo-politikako eragile

Guzti horren aurrean, mugak ixtea erabaki du presidenteak, krisiaren kanpo-politikako enegarren erabakia hartuz. Otsailaren hasieran bi aste aurretik Txinan egondako jendeari sarrera debekatu zion; martxoan osasun publikoarekiko “arriskutsuak” izan zitezkeen atzerritarrei debekatu zien sarrera; eta Europatik joandako jendea izan zen hurrengoa.

Mexiko eta Kanadarekin beste hilabetez muga ixtea adostu du. Onartutako neurri berriei buruz ez du azalpenik eman. Dena den, Trumpen planaren atzean dabiltzanek The New York Times-en adierazitakoaren arabera, lanerako visak emateari utziko diote denboraldi batez. Horrez gain, Mexikoko mugan dauden migratzaileak herrialdetik kanporatzen jarraituko dutela gehitu dute.

In light of the attack from the Invisible Enemy, as well as the need to protect the jobs of our GREAT American Citizens, I will be signing an Executive Order to temporarily suspend immigration into the United States!

— Donald J. Trump (@realDonaldTrump) April 21, 2020