Urte asko dira jada Diadaren deialdiari ezohiko garrantzia aitortzen diotela Kataluniako herritar eta mugimendu independentistek, independentziaren aldeko prozesuaren baitan. Batean mugimendu independentista ahalduntzeko, bestean erreferendumaren alde presionatzeko, hurrengoan erreferendumaren emaitzan berresteko, eta beste. Aurtengo Diada epaitegiek baldintzatuta dator erabat.

Urriaren lehen hamabostaldian espero da Espainiako Auzitegi Gorenaren sententzia erreferendumaren arduradun politiko eta sozial nagusien aurka. Zigor gogorrak aurreikusten dira, eta erantzun irmo eta bateratua emateko deiak etengabeak dira. Indar independentisten artean, baina baita erreferenduma defendatzen duten edo estatuaren erantzun errepresiboaren aurka dauden bestelako pertsona edo mugimendu batzuen ahotan ere.

Batasunerako deien gainetik, ordea, liskarra nagusitu da ikasturte osoan Katalunian. Bai alderdien artekoak, baita alderdien eta ANC, Omnium edo CDRen moduko independentziaren aldeko mugimenduen artekoak ere. Urtero ANCk deitzen duen Diadaren mobilizazio nagusia bera liskarrerako motibo bihurtu da aurten. Azkenaldian, ordea, zenbait batasun keinu praktiko ikusi dira. Iraileko lehendabiziko asteburuan mugimendu politiko eta sozial independentista nagusiak eta erbesteratuak Genevan (Suitza) bildu ziren epaiari eman beharreko erantzuna adostu nahian. Hurrengo egunean, irailaren 2ko astelehenean, Tsunami Democrátic jaio zen ildo horretan eta desobedientzian sakondu nahian. Astelehen honetan preso eta erbesteratu politiko katalan guztiek sinatutako idatzia argitaratu da, Diada masibo eta bateratu batera deituz eta urriaren 1eko izpiritua aldarrikatuz. Izan ere, independentismoaren barnean aurtengo Diada epaiari eman nahi zaion erantzun bateratuarentzako mugarria izatea nahi da.

“Independentzia helburu”

“Independentzia helburu” da ANCk aurtengo Diadarako aukeratutako leloa. Abuztuan alarma jo zuen antolakunde independentistak, izen emateak aurreko urtearekin alderatuta laurden batean egin zutelako behera. Independentismoan bizi den etsipenaren seinalea, askoren ustez. Ordutik joera aldatu egin da, eta aurreko edizioetako kopuruetara hurbildu dira. Iragan igandean ANCk jakinarazi zuen 300.000 herritar baino gehiagok eman dutela izena internet bidez. 1.000 autobusetik gora daude mobilizatuak egunerako, eta 240.000 kamiseta dituzte salduak. ANCk milioi bat herritar baino gehiago biltzea espero du. Lortuz gero, zortzigarren urtea litzateke jarraian.

Irailaren 11ko manifestazio nagusia 16:00etan hasiko da. Graciako pasealekua eta Espainiako plaza arteko bidea hartuko du, eta plazatik irteten diren sei kale ere okupatuko ditu.

Ekitaldi eta mobilizazio ugari

Diadaren ospakizunaren bueltan, bestelako ekimenak ere ugariak dira urtez urte. Maila instituzionalean, lehen ekitaldia legebiltzarrena izango da, astearteko 20:00etan. Legebiltzarreko presidente Roger Torrentek Urrezko Domina ezarriko die Sea Watch itsasontziko Carola Rackete kapitainari eta Proactiva Open Arms GKEko zuzendari Óscar Camps-i, Mediterraneo itsason errefuxiatuen alde egin duten lanagatik. Astearte gauen, argi-zuzi martxa bat deitu dute LLedonerseko espetxeraino, bertan dauden presoei elkartasuna helarazteko.

Irailaren 11ko eguna Rafael Casanovari egiten zaion lore eskaintzarekin hasiko da. Arratsaldeko manifestazioaz gain, ANCk kanpaina informatiboa egingo du 10:00ak eta 15:00ak artean. “Ahalduntze herritarra” bultzatzeko ildoan ari da lanean ANC, independentziaren bidean urrats indibidual eta kolektiboak sustatuz. Horietako bat kontsumo estrategikoaren kanpaina da, herritarren kontsumoa Ibex 35 enpresetatik deslotu nahi duena. Omniumek, bere aldetik, presoen absoluzioaren aldeko ekitaldia egingo du eguerdian Lluís Companys pasealekuan. Eskaintza zabalago baten adibide batzuk besterik ez dira.

Urtero legez ezker independentistak deialdi propioa egin du ANCren manifestazioaren osterako. “Botere herritarra antolatzen. Independentziaren bidean ez dago laburbiderik” dute aurtengo lelotzat. CUP, ARRAN, edo Alerta Solidaria antolakundeek “autoantolakuntza herritarra eta desobedientzia” aldarrikatuko dituzte “Herrialde Katalanen eskubideen konkistarako”.