Deklaratzeari ekin diote martxoaren 24ko ikasle greban Gasteizen atxilotutako gazteek

  • Gasteizko campusean 34 ikasle atxilotu zituzten IAk martxoaren 24rako deitutako greban, eta "desordena publikoak" eragitea leporatzen diete. Urtarrilera bitartean deklaratu beharko dute.

Argazkia: Gedar
Artikulu hau CC BY-SA 2.0 lizentziari esker ekarri dugu.

2022ko azaroaren 02an - 17:11

Ikasle Abertzaleakek grebara deitu zituen Hego Euskal Herriko ikasleak joan den martxoaren 24rako, hezkuntza erreformen aurka eta Hezkuntza Sistema Sozialistaren alde. Milaka gaztek egin zuten bat greba deialdiarekin, eta mobilizazio jendetsuak izan ziren Bilbon (Bizkaia), Donostian (Gipuzkoa), Gasteizen (Araba) eta Iruñean (Nafarroa).

Goizean piketeak izan ziren hamaika ikastetxe eta campusetan, eta ikasleen kontra oldartu ziren polizia-indarrak. Nafarroako Unibertsitate Publikoan gazteen aurka gogor jo zuten segurtasun-indarretako agenteek, eta Foruzaingoa sartu zen campusera. Euskal Herriko Unibertsitatearen (EHU/UPV) Gasteizko campusean, berriz, 34 ikasle atxilotu zituen Ertzaintzak. Arratsalde horretan bertan, protestak izan ziren hainbat eta hainbat herritan, atxilotuei babesa emateko.

"Desordena publikoak" eragitea egozten diete ikasle grebalariei, eta horren harira, epaitegian deklaratzen hasi dira jada. Urriaren 21ean hasi ziren auzipetuen deklarazioak; egun horretarako, bost gazte zeuden deklaratzera deituta. Urtarrilera bitartean deklaratuko dute gainontzeko 29 auzipetuek; hurrengo saioa, hain zuzen, azaroaren 11n izango da.

EHUk ere diziplina-neurriak

EHUk diziplina-prozedurak ireki ditu atxilotutako 34 ikasleen kontra, baina une honetan geldirik daude horiek; prozesu judiziala bukatu bitartean, behintzat.

Horretaz gain, ikasle greba horretan EHUko campusetan izan ziren "kalteak" direla-eta, 83.000 euroko faktura bat aurkeztu du EHUko zuzendaritzak.


Kanal honetatik interesatuko zaizu: Ikasle Abertzaleak
Hezkuntza sistema sozialista aldarrikatu dute ikasleek, martxoaren 20ko ikasle greban

Grebara jo dute bigarren hezkuntzako, lanbide heziketako eta unibertsitateko ikasleek. Ikastetxeen ohiko jarduna gelditu eta kaleak hartu dituzte “negozioen eta inposizioen” hezkuntzaren kontra Bilbon, Donostian, Gasteizen eta Iruñean. Goizeko aurreneko... [+]


Hezkuntza "pribatizaziotik" ateratzeko, borroka

Ikasle Abertzaleak taldeak grebarako deia egin du martxoaren 20rako. Negozioen eta inposizioen hezkuntza borrokatu goiburuarekin manifestazioa ere eginen dute 12:00etan Iruñeko Foruen Plazatik aterata. Unibertsitatera sartu aurretik eta goi mailako ikasketak egiterako... [+]


Greba antolatu du martxoaren 13rako Ikasle Abertzaleak-ek

Eusko Legebiltzarraren aurrean elkartu dira Ikasle Abertzaleak-eko kideak martxoaren 13rako ikasle grebara deitzeko. “Azken hilabeteetan borroka prozesuak martxan jarri ditugu Euskal Herriko ikastetxe eta campusetan eta, orain, pausu bat gehiago emateko unea dela uste... [+]


2023-09-24 | Mikel Eizagirre
"Militantzia politikoaren zilegitasuna defendatu behar da, inolako baldintzarik gabe"

2016ko apirilean atxilotu zituzten Leioako 5ak, errepresioaren aurkako ikasle protesta batean. Zazpi urteren ostean izango da epaiketa, irailaren 27an, eta 39,5 urteko espetxe-zigorrak eta 45.000 euroko kalteordainak eskatuko dizkiete. Epaiketaren atarian, haietako birekin... [+]


2023-09-19 | Gedar
'Leioako 5en' askatasuna exijitu dute Altsasun

Irailaren 27an epaituko dituzte 'Leioako 5ak', 2016an Leioako campusean izan zen ikasle mobilizazio baten harira. 45.000 euroko eta 40 urteko zigorrak eskatzen dituzte haientzat. Aste honetan ere mobilizazioak egingo dituzte, auzipetutako bost lagunen eskualdeetan nahiz... [+]


Eguneraketa berriak daude