ARGIA.eus

2020ko urriaren 22a

Caracas, krisirik sakonenean murgilduta dagoen hiria

  • "Azken 200 urteetan izandako erasorik handiena" batzuen arabera, "historiako egoerarik latzena" besteen iritziz. Bizitzak eta agenda politikoak ez dute etenik seigarren egunez ur gabe bizi den hiriburuan.

Ibai Trebiño @ibaitrebino
2019ko martxoaren 13a
Oposizioaren burua Juan Guaidóren mitina Caracasen. Argazkia: Ibai Trebiño

Asteazkenean apurka-apurka hornidura bere onera itzultzen hasi bazen ere, gaia denon ahotan dago. Gizalegez eta errespetuz, argi eta ur faltak eztabaida ugari sortzen ditu kalean. Bolivar plaza zentrikoan esaterako, neska gazte batek haserre dio: "Ez dugu urik, ezta argirik ere. Ez dut dirurik eta nire bost seme-alabak gosez hiltzen ari dira". Handik bi metrora dagoen emakume baten erantzuna dator: "Nik senarra galdu nuen eta nire lau seme-alabak bakarrik hezitu behar izan nituen. Lan egiten nuen etxebizitza ordaindu ahal izateko eta hortaz gain seme alabak zaintzen nituen. Egungo gazteak ordea... –arnasa sakon hartu du– zer zorte handia duzuen! Gobernuak etxebizitza oparitzen dizue eta seme-alaba bakoitzeko 18.000 bolivarreko (Venezuelako soldata minimoaren baliokidea) diru-laguntza jasotzen duzue". Segundo bateko isiltasunaren ondoren ura eta argiaren krisia berriz bilakatu da hizketagai eta orduan bai, biek adostasuna lortu dute: "Etena oposizioak eragin duela diote eta ziurrenik egia izango da". 

Handik ez oso urrun, Anaren kioskoarekin egin dugu topo; oposizioaren ildoarekin bat datozen egunkariak baino ez dira salgai bertan eta, venezuelar orok bezala, krisiaren inguruko iritzia ematen du Anak: "Gauzak gaizki daude. Ez dugu urik eta Guaire ibaiko ur zikina edatera behartuta gaude. Sekula ez dugu bizi izan horrelako egoera latzik hemen". Anaren iritziz, krisia gobernuaren errua da eta elektrizitatearen gabeziaren inguruan gobernuak emandako bertsioa "faltsukeria handia" da. Etsipenez, krisi politikoak "irtenbiderik ez duela" aitortu du eta Guaido presidente autoizendatuari "ezer ez erakustea" leporatu dio.

Agenda politikoak etenik ez

Oraingoan oposizioak hartu du bere gain mobilizazioen agenda. Urtarrilaren 23ko estrategiaren porrotaren ondoren, otsailaren 23ko estrategiaren porrota heldu da eta hilabete eta erdiz mobilizatu gabe izan ondoren, estrategia berri bateri ekin diote. Hamaikagarren saiakera. Oposizioak "kaleak hartzeko" beste deialdi bat egin eta du eta hari erantzunez, hainbat mobilizazio egin dute Caracasen, gehienak txikiak, isolatuak eta baketsuak, San Martingo hiribidean burututakoa ezik. Han tentsioa izan zen manifestariek poliziei harriekin eraso egin ondoren.

Hiriaren beste aldean, Caracaseko orohar oposizioaren aldekoa den ekialdean, egin da mobilizaziorik jendentsuena eta azpimagarriena. Han oposizioaren buru Juan Guaidók mitina eskaini du ehunka jarraitzaile eta dozenaka kazetarien aurrean.

"Esku-hartze humanitario bat justifikatzea du helburu erasoak"

Hala edo nola, Chavismotik gertu dagoen hainbat sektorek ere agenda politikoari eutsi diote. Esaterako, gobernuko PSUV alderdiaren gazteek dozenaka pertsona bildu dituen ekimen politikoa egin dute Miraflores jauregi presidentzialaren inguruetan. "AEBetako inperialismoari" egotzi diote herrialdearen egoeraren erantzukizuna.

ARGIAk galdetuta, Basem Tajeldine analista politikoak ere ontzat jo du ofizialismoak emandako bertsioa eta argindarraren etena AEBetako ziber-erasoen ondorioa izan dela uste du: "Nazioarteko hainbat adituk horrela frogatu dute, baita gobernuak ere". "Ez da lehenengo aldia estatubatuarrek horrelako eraso bat egiten dutena eta argi dago Venezuela ez dela salbuespena izango", esan du Tajeldinek.

Analistak azaldu duenez, "erasoak elektrizitate ezak ekarri du eta horren ondorioz uraren krisia etorri da" eta horren helburua "herria desmoralizatzea" litzateke Tajeldinen iritziz, "esku-hartze humanitario bat justifikatzeko". "Halere, ez dute lortu. Erasoari erantzun tinkoa eman dio herriak", adierazi dio ARGIAri.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Venezuela

Venezuela kanaletik interesatuko zaizu...


Azkenak
EGILEA
Argia buletina
Egunaren laburpena
zure e-postan
Eguneraketa berriak daude