Bortxatzaile bat zure bidean Las Tesis kolektibo feminista txiletarrak azaroaren 25ean Santiagon egin zuen performancea mundu osora zabaldu da, han-hemen mugimendu feministaren ereserki bilakatuz. Koreografiaz lagundutako abestiak indarkeria matxistak eta horiek betierekotzen dituzten instituzioak ditu jo puntuan, eta erasoen errua erasotzaileena ez beste inorena dela azpimarratzen du.

Emakumeen aurkako bortxak salatzeko ekintza Bilbora ere heldu da. Abenduaren 3an Karmelan egindako entseguaren ondotik, abenduaren 19ko ostegun iluntzean, permormancea gorpuzteko xedez, 500 emakumetik gora bildu ziren udaletxearen aurrean. Ekintzaren jatorrizko moldeari eutsi zioten Bizkaiko hiriburuan ere: emakumeen borroka ikusezina dela adierazteko begiak estalirik aritu ziren emakumeak, ikusezina den hori ahots goran abestuz; janzkerari dagokionez, kolore deigarridun jantziak eta bularretakoak agerian ikus zitezkeen, adierazi nahirik janzkerak ez duela inolaz argudiatzen bortxaketa.

Performancearen jatorria gogoan hartuta, elkartasun internazionalista ariketa ere egin zuten, Hego Ameriketako emakumeei ez ezik, mundu zabalekoei ere beren babes guztia helaraziz. “Gure amorru eta indar guztia helarazi nahi diegu ahizpa txiletarrei, latinoamerikarrei eta lurralde ezberditan Estatuaren, indar armatuen eta kapitalaren errepresioa jasaten ari direnei”, adierazi zuten komunikatuan. Ildo horretan, lehen lerroak hego amerikar jatorridun kideek bete zituzten; herrialde ezberdinetako banderak, Argentinako abortu eskubidearen aldeko zapi berdeak eta whipalak soinean aritu ziren asko.

Ozen eta elebitan abestu zuten indarkeria matxisten aurka: euskaraz lehenik, eta gazteleraz ondoren.

#BortxatzaileBatZureBidean #Bilbo @lastesisoficial #BortxatzaileaZuZara pic.twitter.com/zzLAGRvkJM

— Ecuador Etxea (@EcuadorEtxea) December 19, 2019