Borrokan hildakoek eta lagunek piztu zuten Newroz-aren sua Bilbon

  • Martxoaren 23an ospatu zuten Newroza, urte berri kurdua, Bilbo Zaharreko plazan hainbat lagunek. Ekitaldi xume eta hunkigarria izan zen. Une latzak dira Kurdistango Askapen Mugimenduarentzat, baina zapalkuntzari ohitu den herri horrentzat inoiz ez dira garai oparoak, eta horrek ez dio dantzatzeko gogoak kentzen.

Aitor Aspuru Saez
2018ko martxoaren 26a
Argazkia: Ecuador Etxea

Antolatzaileek gogoratu zutenez, Turkiak Afrin kantoi siriarra okupatu du eta erresistentziak jarraitzen badu ere, otomanoek eta bere txotxongilo islamistek sarraskiak eta txikizioa zabaldu dituzte bertan.

Horren isla izan dira frontean hildako YPG eta YPJ autodefentsarako talde kurduen boluntario internazionalistak. Batzuek lotura zuzena zuten Euskal Herriarekin eta horren adibide izan zen atzoko ekitaldia. Izan ere, Olivier Le Clainche bretoiaren, Anne Campbell bretainiarraren eta Alina Sanchez argentinarraren lagun eta ezagunek hartu zuten hitza.

Olivierri buruz aritu zen estatu espainiarreko YPGko miliziano ohi bat. Raqqako frontean elkar ezagutu ziren eta une gogorrak bizi izan zituzten Daexen aurkako borrokan, baina bereziki nabarmendu zuen zein burkide ona zen egunerokoan. Halaber, gazteak gogoratu zuen Olivierrek Euskal Herriari hainbat aldiz adierazi ziola elkartasuna eta euskara ere ikasi zuela. Harreman horren eredua metro eskasera zegoen; publikoaren artean entzuten ari zen euskal preso ohia, hamaika aldiz estatu frantseseko espetxetan bere bisitak jaso izan zituena, alegia.

Anna Campbellen lagun minek Ingalaterran ezagutu zuten eta berari buruz mintzatzean ezin izan zituzten malkoak ekidin. Bere izaera alaia eta konprometitua oroitu zuten, eta euren bihotzetan betirako eramango zutela azpimarratu zuten.

Azkenik, Durangoko mediku batek azaldu zuen Alina Sanchez Rojavan ezagutzeko aukera izan zutela bera eta zenbait kidek. Eurekin egon zen bertan izandako egonaldian eta bere berotasuna ez ezik, goraipatu zuten emakume gazteak Cuban medikuntza ikasi zuela ere. Horrek Siriako iraultza kurduan toki berezia eman zion.

Giro hunkigarri horretan, minutu bateko isilunea egitea aski erraza izan zen eta, ostean, sua piztu zuten, dantzak abiatzeko eta gogoratzeko zapaltzaileei herri kurduak eta bere erresistentziak bizirik jarraitzen dutela.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Internazionalismoa  |  Kurdistan  |  Bilbo

Internazionalismoa kanaletik interesatuko zaizu...
Azkenak
EGILEA
Eguneraketa berriak daude