2015eko Bizkaiko udal hauteskundeen emaitzen mapa interaktiboa.

Ezustekorik ez. EAJk irabazi ditu hauteskundeak Bizkaian (%61eko parte hartzea izan da), eta gainera hobetu egin ditu orain dela lau urteko emaitzak: 23 jesarleku. Hala, jeltzaleak izan dira, Podemosen agerpena alboan utzita, batzarkiderik galdu ez duen alderdi bakarra. Hori bai, ez dute gehiengo absolutua (26) lortu.

Podemos indar handiz sartu da BBNNetan: sei batzarkide, ia botoen %100 zenbatu denean. Laugarren alderdia izango da. Bigarren EH Bildu mantenduko da, batzarkide bat galduta (12tik 11ra); hirugarrenak, PSEk, bi jesarleku galdu ditu (9tik 7ra), eta PPk lau (8tik 4ra).

Udal hauteskundeei dagokienez, EAJk gehiengo absolutua galduko du Bilbon, baina aise irabaziz, eta hauteskundeak irabaziko ditu halaber Barakaldon (65 botoko aldeaz), Getxon, Santurtzin, Basaurin eta Leioan.

Hala, Portugalete izango da jeltzaleak garaile izango ez diren Bizkaiko udal handi bakarra (30.000 biztanletik gora). Han, PSEk irabazi ditu hauteskundeak. Alabaina, sozialistek ez dute azken urteetako gainbehera gelditzerik izan: Portugaleten ez ezik, Ermuan baizik ez dute irabazi. Aldiz, EAJren atzean geratu dira 2011n irabazi zuten udal bitan: Trapagaranen eta Barakaldon, bigarren horretako emaitza berdinketatzat jo badaiteke ere.

PSErenak bezala, txarrak izan dira PPren emaitzak. Batzuek eta besteek zinegotzi dezente galdu dute, eta zenbait udaletan ordezkaritza gabe geratu dira.

EH Bilduk eutsi egin dio oro har, eta 28 udaletan izan da alderdi bozkatuena, baina hainbat alkatetza esanguratsu galduko ditu. Ezusteko handiena, beharbada, Lekeitiokoa izan da; EAJk irabazi du han.

Azpimarratzekoa, halaber, Gernikako emaitza. Azken legegintzaldian EJ Bilduren izenean alkate izandako Jose Maria Gorroñok EAJrekin bat egin du eta udalbatzaren osaera erabat iraultzea lortu du: sei zinegotzi gehiago atera dute jeltzaleek, beste horrenbeste galdu ditu EH Bilduk (Gernikan ordezkaritza duten alderdi bakarrak dira). Sopelan ere EAJk irabazi du, eta orain lau urte ezustean galdutako aginte makila berreskuratuko du.

Podemosi lotutako udal plataformek emaitza onak lortu dituzte oro har; zinegotzi asko lortu dituzte, zenbait lekutan bigarren edo hirugarren indar bilakatuz. Aipatzekoa da Bilbon bina zinegotziko ordezkaritza lortu dutela Podemos ordezkaritza aldarrikatzen duten talde bik: Udalberri eta Ganemos. Lehenbizikoan Podemoseko kideak daude, Equo, Ezker Anitza eta beste zenbait talderekin batera. Ganemos, berriz, Podemoseko kide ohiek osatzen dute.

Guztira, EAJk 559 zinegotzi lortu ditu, EH Bilduk 394, PSEk 77 eta PPk 26. Zaila da Podemosi lotutako hautagaitzen emaitzak kalkulatzea, ez baitira sigla bakarrarenpean aurkeztu.

EAJk gehiengo absolutua lortu du 43 udaletan, eta erlatiboa 26tan. EH Bilduk 28 udaletan irabazi du, horietatik 26tan gehiengo absolutuz.