ARGIA.eus

Bultza kazetaritza independentea
Bideo batekin frogatu dute

Errefuxiatu bati tiro egin diote Bulgariako poliziek, Europako Batasunaren mugan

  • Ikerketa kazetaritza egiten duen Lighthouse Reports erakundeak frogatu du urrian Bulgariako agenteek Siriako gazte bat tirokatu eta zauritu zutela Batasunak Turkiarekin duen mugan. Halako gertakari bat bideoan grabatu eta zabaldu den lehen aldia da.

Iñaki Agirre
@ikiagirre

2022ko abenduaren 12a - 10:22

Ez da Europako Batasunean errefuxiatuen aurka su-armak erabiltzen diren lehen aldia, baina honakoan pertsona bat zauritu dute, eta erasoa bideoan grabatuta geratu da. Urriaren 3an, Bulgariaren eta Turkiaren arteko mugan, EBko kide den herrialdeko agenteek errefuxiatu talde baten aurka tiro egin zuten, eta Siriako 19 urteko gazte bat eskuan eta bularrean zauritu zuten. Berarekin zihoan kide batek mugikorrarekin grabatu zuen gertaturikoa, eta Lighthouse Reports erakundeak argitara eman du orain, Bulgariako polizia zuzenean seinalatzen duen analisi forentse batekin batera.

Bulgariak onartu du bere agenteak mugako zonalde horretan zirela, baina suzko armak erabili izana ukatu du. Ikerketak, baina, argi utzi du tiroak mugako poliziak aurkitzen ziren lekutik egin zirela, bertan izan ziren lekukoen bertsioak berretsiz.

Lighthouse Reports-ek egun hartan gertatutakoa errepasatu du:

“Urriaren 3ko arratsaldearen bukaeran, mugako hesitik gertu, Europako Batasunean asiloa eskatu nahi zuten gazte batzuk zeuden. Bulgariatik kanporatu berri zituzten eta, protesta gisa, batzuek harriak bota zituzten mugara. Bat-batean tiro egin zuten, eta siriar nerabe bat lurrera erori zen”.

Zaurituriko gaztea Abdullah Mohammed deitzen da, eta ikerketa burutu duen erakundeari kontatu dio egun hartan jazotakoa:

“Niregana jotzeko modua oso zuzena izan zen, tirokatzeko asmo argiarekin. Haren [agentearen] eta nire arteko distantzia oso motza zen, hamar eta hamabost metro bitartekoa, eta hiltzeko asmoz egin zuen tiro”. Balak eskua gurutzatu zion eta bularrean sartu zitzaion, bihotzetik zentimetro batera geratuz eta birikei ere eraginez. “Medikuak esan zidan miraria dela bizirik jarraitzea”, adierazi du.

Haren aurkako erasoa berezia da, EBko muga batean pertsona errefuxiatu bat suzko arma batekin tirokatua izan dela lehen aldiz bideoan grabatu delako, baina halako edo antzeko gertakariak gehiagotan eman dira EBren mugetan. Grezian, esaterako, kostazainek behin baino gehiagotan egin dute tiro Mediterraneoa gurutzatzen ari ziren ontzien aurka. Espainian, bestalde, Guardia Zibilak gomazko pilotekin tiro egin zien 2014an Tarajaleko hondartzara heltzeko ahaleginetan igerian ari ziren dozenaka migratzaileri, eta haietatik hamabost hil egin ziren.

Europako Batzordeak azalpenak eskatu ditu

Bideoaren eta Lighthouse Reports-en ikerketaren argitalpenaren harira, Europako Batzordeak adierazi du “onartezina” dela errefuxiatu eta migratzaileen aurka indarkeria erabiltzea, eta Bulgariako mugan gertaturikoa argitzeko eskatu du. Asteartean eskainitako prentsaurrekoan, Anitta Hipper EBko Barne Ministerioko bozeramailea gaiaren inguruan mintzatu zen: "Espero dugu agintari nazionalek salaketa guztiak ikertzea eta salaketek jarraipen azkar eta eraginkorra izatea”.

Dena den, Hipperrek uko egin dio Batasuneko erakundeen bitartez gertakariaren gaineko ikerketa bat abiatzeari, gaia argitzea Bulgariaren ardura dela argudiatuz.


Errefuxiatu krisi globala kanaletik interesatuko zaizu...
Gasteizko Etxebizitza Sindikatuko kide bat atxilotu dute, eta deportatua izateko arriskuan dago

2021ean atxilotu zuten, Ertzaintzak bera ere bizi zen etxebizitza-blokea hustu zuenean, eta deportazio-espediente bat ireki zuten bere kontra. Kidearen berehalako askatasuna exijitu du Etxebizitza Sindikatuak, eta salatu du gertatutakoa ez dela kasu isolatu bat... [+]


Keniako errefuxiatu kanpalekuetan hirukoiztu egin da haurren desnutrizioa

Afrikako adarra berriz dago muturreko egoeran sikateak eta gatazka armatuek eraginda, eta ondorioak errefuxiatu kanpalekuetan pairatu dituzte: Keniako kanpaleku handienetako batean %33 hazi dira malnutrizio kasuak, eta horietako gehienak haurrak dira.


2023-01-20 | Iñaki Agirre
Mediterraneoan turistekin dabiltzan ferryetan legez kanpo deportaturiko migratzaileentzako ezkutuko ziegak daude

Italiaren eta Greziaren arteko ibilbideak egiten dituzten ontzi komertzialetan asilo eskatzaileen itzultze ilegalak burutzeko ziega ezkutuak daudela frogatu du Lighthouse Report erakundeak.


2022-12-20 | Iñaki Agirre
Caminando Fronteras-en txostena
Eguneko sei pertsona hil dira Afrikatik Espainiara doazen migrazio-bide nagusietan 2018tik

Caminando Fronteras kolektiboak argitaratu berri duen txosten baten arabera, 11.286 pertsona hil dira azken bost urteetan Europako Mendebaldeko muga gurutzatzeko ahaleginetan.


Eguneraketa berriak daude