Asilo eskatzaileek baldintza zorrotzagoak bete beharko dituzte AEBetako muga gurutzatu ahal izateko, Joe Bidenen gobernuaren azken legea indarrean sartzen bada. Etxe Zuriak “migrazio irregularra mugatu” nahi du, eta horren ordezko “prozesu gehigarri seguru eta ordenatuak” sortu. Horretarako, asilo eskaera onartzen ez dieten edota AEBetara era irregularrean heltzen diren migratzaileak Mexikora bidaliko dituzte eta ezingo dute berriz eskaerarik egin; bost urtez debekatuko diete herrialdean sarrera. Neurria helduei eta familiei ezarriko diete, ez, ordea, muga bakarrik gurutzatzen duten adin txikikoei. Giza eskubideen aldeko zenbait taldek neurria kritikatu, eta Donald Trump presidente ohi kontserbadorearen politikekin alderatu dute.

8. titulua du izena neurriak, eta maiatzean indarrean sartzea aurreikusi dute. Trumpek 2020an ezarri zuen 42. tituluaren ordezkoa da. Orduko hartan, COVID-19aren krisi betean. Trumpek, osasun neurrien argudiopean, 3 milioi migratzaile itzularazi zituen lege horrek baimenduta. Kontuan hartu behar da urtean 200.000 migratzaile irregular inguru saiatzen direla AEBetako muga gurutzatzen. Lege horrek harrabots handia sortu zuen, nazio mailan zein nazioartean: Bidenen exekutiboak AEBetako Auzitegi Gorenera eraman zuen, eta mantentzearen alde azaldu zen auzitegia iazko abenduan. Horregatik, espero zuten Bidenen hurrengo migrazio legea gizatiarragoa izatea, Biden berak ere horrela hitz eman baitzuen.

Baina iragarri duen lege berria bere orain arteko murriztaileena da, eta bi urtez egongo da indarrean, luzatzeko aukerarekin, maiatzean ezartzen badute, bederen. Migratzaileek, oraindik beren jatorrizko herrialdean edo bidean daudenean, txanda eskatu beharko dute AEBetako mugako funtzionarioekin, asilo eskaera tramitatu ahal izateko. Horrela baino ezingo dute muga gurutzatu. Bidenen exekutiboak argudiatu du neurriaren helburua dela Mexikorekin duten mugara heltzen diren migratzaileen kopurua jaistea eta migratzaileek bidean dauden mafiekiko duten menpekotasuna murriztea.

Giza eskubideak kontutan hartu barik

Neurriaren berri izan bezain pronto, giza eskubideen aldeko taldeek eta nazioarteko erakundeek bere aurka egin dute. ACLU Amerikako Estatu Batuetako Askatasun Zibilen Aldeko Batasunak jakinarazi du neurriaren aurkako errekurtsoa aurkeztuko duela, neurria migratzaileen eskubideen aurkakoa dela iritzita: “Biden presidentearen proposamenak jende zaurgarria arriskuan utziko luke, eta, gainera, milaka pertsonari babesa ukatuko lioke”.

Bide beretik joan dira Oxfam America eta AI Amnesty International. Biek salatu dute neurriak migratzaileei bizkarra emango diela. “Muturreko debeku honek atea itxiko die ezin konta ahala errefuxiaturi, AEBen segurtasuna eta babesa baino ez dute bilatzen”, azaldu du lehenak. Horrekin bat etorri da AI, eta gehitu du: “Plan horrek ahuldu egiten du asilorako giza eskubidea”.