Bermeoko Udalak txosna gunearen ordutegia murriztu eta arriskuan jarri duela salatu dute

  • Bermeoko jaietako txosnetan aritzen diren kideek prentsaurrean eman dute beren esanetan udalak jarri dizkien zailtasunen berri. Kontzertuak antolatzeko elkarlan falta eta gunearen ordutegi murrizketa aipatu dituzte, besteak beste.

ARGIA @argia
2019ko irailaren 05a
Herritar askoren babesa izan dute prentsaurrekoan Bermeoko txosna batzordeko kideek (Argazkia: Gatom)

Barikuan hasiko dira Bermeoko Andra Mari jaiak eta hango txosna gunean ari direnek egitarau zabal antolatu dute irailaren 16ra arte, kontzertu ugari, “Pirata Eguna” eta “Eguen ganberrue”, tartean, baita 500 lagunentzako bazkaria ere. Baina horretara iristeko izan dituzten zailtasunak salatu dituzte ostegun goizean prentsaurrean.

Txosna batzordeko ordezkariek azaldu duenez, kontzertuak antolatzeko udalarekin elkarlana abiatu eta “inoizko eskaintzarik handiena” prestatu zuten. Baina, euren esanetan, "hilabetetako lanaren ostean, kultura sailak hankaz gora jarri du” musika taldeekin hitz egindakoa. Egoera horrek sortu dien “etsipena, haserrea eta dezepzioa” nabarmendu dute.  

Hala ere, 30 ekintzatik gora antolatzea lortu dute eta antolaketa ereduari berari “buelta ematea” ere bai. Azpimarratu dutenez, txosna guneko eskaintza urtetik urtera handitzen ari da. Irabazitakoaren gehiengoa hurrengo urteko egitaraua prestatzeko erabiltzen dute eta gainerakoa txosnetan parte hartzen duten herriko taldeen ekimenak diruz laguntzeko.

Baina zailtasunak ez dira kontzertuen antolaketara mugatu, euren esanetan. Bermeoko Udalak ordutegi murrizketa egin du “alde bakarreko erabakiz”, hasiera batean larriagoa, baina azkenik ordubetekoa izango da. Erabaki horrekin, udalak txosna gunearen jarduera bera arriskuan jarri duela salatu dute, eta eskatu dute herriko jaiei egiten dieten ekarpena “balioan ipintzea” behingoz.

Nolanahi ere, “oztopoak oztopo”  jai herrikoien alde lanean jarraituko dutela azpimarratu dute txosna guneko kideek.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Jai herrikoiak  |  Bermeo

Jai herrikoiak kanaletik interesatuko zaizu...
Azkenak
EGILEA
Eguneraketa berriak daude