Azken urratsaren faltan, buelta erdia ematear dira

  • Muga zeharkatzea ezinezkoa da estatubatuar militarren begiradapean. “AEB ez da babeslekua” dio Trumpek. Ehun lagun inguru beraien herrialdera itzuli da dagoeneko.

Gorka Peņagarikano @gorkap34
2018ko abenduaren 07a

Ez aurrera eta ez atzera dago migratzaileen karabana. AEBek hesia igarotzea zaildu dute; militarren presentzia areagotu da. Saiakera asko egon dira, baina Trumpen erantzuna argia da: harrapatutakoak deportatu egingo dituzte. Hiru aste baino gehiago daramatzate mugan, eta bizirautea jasanezina izaten ari da. Ezintasuna gailentzen doa.

Indar gehiago hartzen ari da migratzaileen aurkako mugimendua. Manifestazioak ez dira lehen bezain sarri egiten, baina “pozik” daude migratzaileek laster amore emango dutelako. Egoeraren jakitun dira. Mexikoko Gobernuak erabakia hartu du: migratzaileei emandako laguntzak murrizten joango da. Hesia igaro ordez, autoz igarotzea da aukeretako bat. Mafiek sartu dute eskua: bidaiarengatik 4.000 eta 8.000 dolarren artean eskatzen ari dira. Aduanetako kontrolak are ugariagoak dira, AEBek badutelako honen berri.

Migratzaileetako batzuk jada buelta erdia eman dute Publico.es-k jaso duenez. Nazioarteko Migrazioaren Erakundeak hegazkin zerbitzua eskaini die, eta ehun lagun inguru Hondurasera itzuli dira. Hau aldiz, ez dago denen eskura: batzuek etxea galdu dute karabanan parte hartzeagatik.

Gehiengoak mugan jarraitzen du, zain. Zailtasunak zailtasun, ez dute amore eman nahi. Batzuek “berehala” nahi dute muga igaro, baina beste batzuk prest dira Tijuanan sos batzuk irabazteko lan ziztrin baten truk, eta mugako giroa “lasaitzen” denean beste aldera pasatzen saiatu. Lehengo “indar blokea” ez da oraingoa bezalakoa: guda indibiduala hasi da.

“Etorri diren lekutik joan daitezela”

“80. hamarkadan AEBek esku onez hartzen zintuen”, dio duela ia berrogei urte muga zeharkatu eta asiloa eskatu zuen hondurastar batek, New York Times-ek jaso duenez. Garaiak ezberdinak dira. Gerra Hotzean murgilduta, AEBez hegoaldeko herrialde komunistetatik ihes egiten zutenek berehala eskuratzen zuten asiloa. Egun ordea, badirudi Ameriketako Estatu Batuen jokaera guztiz ezberdina dela: jada, AEBak ez dira babesleku.

Asilo eskubidea ukatzea legearen aurka joatea litzateke, eta hori ondo daki Donald Trumpek. Asiloa eska liteke, baina gero eta oztopo gehiago jarri ditu. Segurtasun Nazionaleko buru Kristjen Nielsenek argi esan du: “Asiloa pertsekuzio edo jazarpen batetik ihesean dabilenarentzako da, ez lan hobea nahi duenarentzat; onartezinak dira horrelako iruzurrak”. Donald Trumpek Twitter bitartez esan zuen “berehala” bidaliak izan behar direla, epaiaren edo tribunalaren aurretik pasa gabe.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Migratzaileen karabana  |  AEB  |  Mexiko

Migratzaileen karabana kanaletik interesatuko zaizu...
Zirt edo zart

Ez aurrera eta ez atzera dago Ertamerikako migratzaileen karabana Mexikoko Tijuanan. Milaka lagunen ametsa zen, kolektiboaren indarraz baliatuta, AEBetako muga gainditzea. Hilabetea eman dute zain, baina tenperatura baxuak eta euriak larritasuna barreiatu dute kanpamentuetan. Egoeraren larria ikusirik, bakan batzuek etxera itzultzea deliberatu dute. Beste batzuek AEBetako hesien, polizien, militarren eta paramilitarren oztopoei, nola edo hala, aurre egitea erabaki dute.


AEBek gomazko pilotekin eta gas negar-eragilearekin erantzun diete igandean migratzaileei

Astebete baino gehiago daramate Tijuanan, muga zeharkatu nahian. Trumpek 6.000 militar baino gehiago ditu bertan. Igandean muga igarotzen ahalegindu ziren, eta gogor erantzun zuten AEBek.


"Ez zaituztegu Tijuanan nahi"

Xenofobia nagusi da Tijuanan, Mexiko eta AEBen arteko mugan. 5.000 migratzaile inguru daude hirian, ez aurrera eta ez atzera, eta haien kontra manifestatu dira Tijuanako herritarrak.


AEBetara igarotzear da Migratzaileen Karabana

Lehen 800 migratzaileak iritsi dira Tijuanako hondartzetara, eta hesiaren aurrean dira jada. Datozen ordu eta egunetan iritsiko dira gainontzekoak. Trumpek segurtasun indarrak areagotu ditu, eta muga abendura arte itxi du.


Azkenak
EGILEA
Eguneraketa berriak daude