2020ko Enplegu Publikorako Eskaintzari dagokion lehen proba asteburu honetan egingo dute Barakaldoko BECen. Guztira bigarren hezkuntzako irakasle eta Lanbide Heziketako teknikari izateko 1.148 plaza aterako dira, eta 4.000 irakasletik gora daude probara deituta.

Azterketan parte-hartuko duen irakasle batek salatu duenez, ordea, hautagai guztien baldintzen berdintasuna ez da beteko. Izan ere, bularra ematen duten amek ezingo dute azterketa bitartean bularra ematen pasako duten denbora berreskuratu.

Haurrak euren zaintzaileekin edoskitzerako jarritako gelan egon beharko dira azterketa bitartean. Haurrak edoskitu beharra duela ikusterakoan, umearen zaintzaz arduratzen ari denak presidenteari esango dio, hark hautagaiaren tribunaleko kide bati esango dio, eta tribunalekoak pasako du abisua. Orduan atera ahal izango da hautagaia edoskitze gelara joateko. Bukatutakoan azterketaren pabiloira itzuliko da hautagaia, eta QR kontrola berriz pasatu ostean azterketa egiten jarraitu ahal izango du.

Tarte horretan pasatako azterketako denbora, ordea, ezingo dute berreskuratu. Hautagai honek salatu duenez, protokoloa berrikusteko beharra adierazi zioten Hezkuntza Sailari, baina ez dute erantzunik jaso. Dioenez, asteburuko azterketetarako prestatutako protokolo horrek "ez ditu inolaz ere genero berdintasuna zein edoskitze duin eta gaurkotua ez dituelako errespetatzen eta bermatzen".

"Umeak ez dira hiru orduero bularra hartzeko programaturik dauden makinak, imajinatu zelan egongo diren edoskitzerako gela horretan, guztiak batera, euren amen zain mezua bidaltzen denetik ama bertara heltzen den arte, goizeko 8:30etatik, arratsaldeko 15:00ak arte (ordu bateko atsedenaldiarekin)" nabarmendu du. Egoerak ama horiei kezka eta urduritasuna eragingo diela ere gaineratu du, eta galdutako denbora ezingo dutela berreskuratu. "Aita izan berri den gizonezko hautagaiak horrelakorik ez du biziko. Honen erantzunik ere ez dut jaso".